India rama hnam ze hrang hrang te humhalh nana Ministry of Cultural Centres hnuaia Zonal Cultural Centre 7 din kum 25 tlin Silver Jubilee lawmna programme hmangin North East Zone Cultural Centre (NEZCC) leh Art & Culture Department tangkawpa buatsaih Festival of Arts - Yatra kharna chu vawiin chawhnu dar 2 khan Vanapa Hall-ah Mizoram Governor Pu Vakkom Purushothamana’n a hmanpui.

Kalkhawmte hmaa thusawiin Governor chuan NEZCC-in kum 25 lai a lo tling ta chu a lawmpui thu sawiin hnam zia chawisan leh inpumkhatna kawnga an hmalakna ah chhuanawm a tih thu a tarlang a. Festival of Arts-a lemziak, kermawi leh lam chi hrang hrang, hmarchhak state hnam chi hrang hrang ten an entir atang chuan hmarchhak mi te chuan thiamna sang tak an nei tih a pholang a ni tiin zau zawka puanzar zel a pawimawh thu a sawi lang bawk. Hmarchhak chu India ram tenau, hnam leh tawng chi hrang hrang kara lungrual taka chen hona a ni tiin Sorkar Laipuiin Look East Policy a kalpui mekah hmarchhak chu India ram tan chhuahka pawimawh tak a la nih tur thu te a puang bawk a. India ram zau taka hnam ze hrang hrang te inlungrual taka kum tam tak kan lo khawsak hona hlutzia hi hria a, hnam inunauna leh inpumkhatna vawng nung zel tura tan la theuh turin kalkhawmte chu a chah bawk.

Khualzahawm Art & Culture Minister Pu Zoram Sangliana pawhin NEZCC Silver Jubilee lawmna hmang tura hmarchhak state hrang hrang atanga mi 120 rawn tel te chungah lawmthu a sawi a, hnam inpumkhatna thinlung pu zel chunga hmarchhak tana theihtawp chhuah zel turin a fuih bawk.

Ram puma Zonal Cultural Centre 7 te zinga pakhat - NEZCC Silver Jubilee lawmna programme hi hmarchhak State hrang hranga hman tura ruahman a ni a, Assam leh Meghalaya ah te hman zawh tawh niin State dangah te la hman chhunzawm zel tur a ni a, Mizoram ah pawh Lunglei leh Kolasib ah te hman ni tawhin vawiin programme hi a tawpna tur a ni.

Vawiina Festival of Arts kharna inkhawm ah hian NEZCC Director Pu Som Kamei (IPS) pawhin thu a sawi a, state hrang hrang atanga lo kal ten hnam lam chi hrang hrang te entirin lemziak leh kermawi chi hrang hrang te phochhuah a ni bawk a ni.