Vawiin June ni 26 hi khawvel pumah ‘International Day Against Abuse & Illicit Trafficking’ a nih angin Lunglei-ah pawh 162 Bn BSF buatsaihin chawhma dar 10:30 atangin ruihhlo dona kawng zawh a ni a. He kawngzawhah hian BSF sipai 120 bakah Lunglei-a school hrang hrang atangin zirlai naupang engemawzat an tel a, Lunglei Govt. High School, Chanmari atanga bultanin Saikuti Hall, Venglai thleng kawng an zawh a ni.

Saikuti Hall-ah kawngzawhnaa tel zirlai naupang, thalai, NGO aiawhte leh BSF sipaite chu ruihhlo laka inven dan tur leh ruihhloin mihringah nghawng chhia a neih thei dan te inzirtirna neih a ni a. He hunah hian Sub-Hqrs YMA President Pu R.Lalnunthara bakah college leh sikul zirtirtuten thu an sawi a. BSF Dy. Commandant Pu VJS Slaria chuan hun kharna hmangin vawiina rally an buatsaihna chhan ber chu ruihhlo dona kawnga mipuite hrilhhriat a nih rualin BSF leh Lunglei mipuite inkara inhriatthiamna leh thawhhona tha zawk awm theihna tura hmalakna a ni a, kawngzawh hlawhtling taka an neih theihna tura YMA, MJA leh Zirna In hrang hrang ten BSF-te hmalakna  an thlawp avangin lawmthu a hrilh a ni.

Vawiin tlai vek dar 4:00-ah 162 Bn BSF te chuan Zotlang-a an BSF hmunpuiah ‘Awareness Campaign on Drug Abuse & Illicit Trafficking’ an buatsaih bawk a, he hun hi DIG(SR) Pu Joseph Lalchhuana, IPS leh Superintendent, Excise & Narcotics Pu Lalhmingthanga ten hmanpuiin thusawina hun an hmang a ni.