Vawiin chawhma dar 11.00 atang khan Archery Association of Mizoram buatsaih Mizoram Archery Championship – 2012 chu A.R. Ground-ah neih tan a ni a; ni hnih awh tur he championship hi Sports Minister Pu Zodintluanga chuan a hawng.

Pu Zodintluanga chuan, “Thalkah hi Mizoten India rama hming kan lo chher tawhna leh Olympics hial-ah pawh kan lo tel tawhna a nih avangin thangtharte chungah sawrkar chuan beiseina sang tak a nei a; kan tlin tawk ang zelin he infiamna hi tihhmasawn zel kan tum a ni” a ti. Infiamna lama a vawrtawp thleng tura Sports Department te, Mizoram State Sports Council te, sports association hrang hrangte leh infiammite thahnemngaihna chu chhuanawm a tih thu sawiin Sports Minister chuan, “ Mizoram sawrkar chuan kan infiammite hmachhuan chungin Vision 2016 tia hming vuahin hmathlir ropui tak kan nei a; kum 2016-a Olympics lo awm leh turah khian infiamna peng hrang hranga Mizo thalai a tam thei ang berin India ram ai kan awh ve theihna turin theih tawp kan chhuah mek a ni” a ti. Mizoram Archery Championship 2012-a infiammi lo telte chu fuihin, “Mizo naupangte hian talent kan nei tih a chiang a; C. Lalremsanga leh H. Lalremliana ten thalkahna hmanrua leh hmunhma te, kaihruaitu thate an nei lo chung pawha hming an lo chher theih chuan, tuna thalkap thiam inchher hriam mekte hi chu sang takah in invawrh chho thei ngei dawn tih a chiang a. Nangmahni zirtirtu tur pawhin Mizo ngei National Coach in neih tawh avang te, hmanrua leh a zirna hmunte in neih tawh bawk avangin hlawhtlinna sual chhuak turin ka cho let duh che u a ni” a ti bawk.

Archery Association of Mizoram buatsaih Mizoram Archery Championship-ah hian mipa 35 leh hmeichhia 16 an tel a; an zinga lawman dawngte chuan 26th November 2012 atanga Vijaywada (Andra Pradesh) a National Championship-ah Mizoram ai an aw hang a; a titha zual dangte chuan National Level Rural PYKKA Competition, Ranchi hmuna neih turah Mizoram ai an awh dawn a ni. He championship-ah hian sub- junior, junior leh senior ten metre 20, 30 leh metre 70-a hlaa target an inkahsiak a, an tihthat dan indawtin Mizoram-a an ranking pawh siam a ni dawn a ni. Archery Association of Mizoram tan hian Mizoram sawrkar chuan New Capital Complex thlangah thalkah zirna hmun tur a ruahmansak a, In pawh a sak sak tawh a ni.