Sorkar Laipui in kum tin khawfai lawmman a buatsaih thin Nirmal Gram Puraskar, dawngtu Rulchawm khua chuan nimin khan an khua in he lawmman kum 2011 atana buatsaih kumina an dawn lawmna programme an hmang a. He hun hi Home Minister leh bialtu MLA ni bawk Pu R Lalzirliana chuan Govt. Rulchawm High School-ah a hmanpui a ni.

Pu R Lalzirliana chuan Rulchawm khua in khawfai lawmman an dawng leh tun hma lamah pawh hetiang lawmman an lo dawng thin chu Village Council, khawtlang, tlawmngai pawl leh Kohhran hruaitute leh mipui ten faina leh thianghlimna kawnga rilru an sen vang leh an thawhrimna rah anih thu a sawi a. Hemi kawnga khawtlang mipuiin hruaitu te thu awihna rilru an nei chu a lawmawm a, an tih tur dik tan an ti chu an fakawm a, khaw dang tan pawh an entawntlak hle a ni, a ti a. Rulchawm khua in khawtlang thil tih, politiks tel lova an hlut thiam chu lawmawm tiin Rulchawm ‘planned village’ a lo duang tu Brig.T. Sailo a fakawm thu a sawi bawk. Home Minister hian inlungrualna leh tanrualna chuan ram leh hnam a siam thei a, kan tanrual phawt chuan, kan chak in, tumah in min hmusit thei lo anga, kan chunga an leng thei lo ang, a ti a. Pu R. Lalzirliana’n he hunah hian khawtlang hman atan dekchi lian khawtlang hruaitu te chu a hlan a ni.

Programme hi Village Council Vice President Pu R.Lalengmawia’n a kaihruai a, Pi Lalsangpuii Hmar SDO(Civil) Saitual, Pu H. Lallianmawia EE, PHED leh Rulchawm mipui pawh he hunah hian kim hle a ni. In 240 vel awmna Rulchawm khua hian Nirmal Gram Puraskar an dawn bakah 2010 -11 khan Aizawl District Clean Village Award ah pahnihna an la a, kumin Faina Hapta khan Saitual Sub Town hnuaia khaw fai lawmman pakhatna a la bawk a. Fire Prevention Week ah te pawh lawmman an lo la tawh a. Pawisa faia lawmman an dawn te hi Rs. 80,000 lai a tlin tawh thu VCP Pu C. Samuela chuan a sawi bawk a ni.