East Phaileng YMA chuan an din champhaphak vawi 50-na chu November ni 1 leh ni 2 khan Buizova Hall-ah ropui takin an lawm a. A lawmna pui ber, November ni 2 a neihah hian Art &Culture Minister Pu PC Zoram Sangliana chu khuallian a ni.
Pu PC Zoram Sangliana chuan East Phaileng YMA in kum 50 a lo tling ta chu a lawmpui thu sawiin Jubilee chu Bible-in saltang chhuahna ni tia a sawi angin he niah hian an sal tanna engemaw tal atanga chhuak turin kalkhawm te a sawm a. Zuk leh hmuam, ruih theih thil chi hrang hrang bawiha tang te pawhin an taksa tan a that lohzia hriaa sim turin a ngen a ni. Minister chuan YMA chu Kristian nun dan tha ngaisangtu a nih laia chanchintha kan dawn atanga kum 118 lai a liam hnuah pawh hlamzuih kan la nei tlat chu pawi a tihzia sawiin, nuaibo a hun ta hle a ni, a ti a. Branch, Group leh Headquarters ang te pawha ngaihtuahna thar seng turin YMA hruaitu leh member rual te a sawm a ni. Pu PC Zoram Sangliana chuan chi bing anga inlakhran tumna awm thin a duhlohzia sawiin Mizo niha lungawi mai turin mipui te a ngen a. Mizo hnam thendarh tum tu te tan Mizoram sorkarah hmun a awm lo tiin hnam bil leh chi bing ang zawnga inlakhran tumna do turin mipuite a ngen a ni. Minister chuan Jubilee lawma hlim taka hun an hman laia khaw thenawm lawk Ratu-ah tuten emaw sai sual an hnutchhiah avanga Mizo tlangval ten nunna an chan chu pawi a tihzia pawh sawi langin heng mi te hian Mizoram sorkar leh Mizo hnam pawi an khawih tih hria se a duh thu a sawi bawk a ni.
He huna thusawitu dang Central YMA Treasurer Pu R Lalngheta pawhin chibing anga inlakhran chu YMA in a duhlo a, YMA a din chhung chuan a do zel dawn a ni, a ti a. Mizo hnam inluangrualna leh insuihkhawmna pawl tha tak Pathianin min pek a nih angin YMA chuan he ram zim te leh he hnam tlem te thendarh tuma hmalatu te reng reng chu a do zel dawn a ni, a ti.
Minister Pu PC Zoram Sangliana hian East Phaileng YMA hnenah Mara hnam incheina (Mara dress) a pek bakah MHIP hnenah dekchi pakhat leh MUP hnenah pawn dum a pe bawk a ni.
Golden Jubilee lawmna inkhawm hi East Phaileng Branch YMA Vice President Pu HC Lalhriatpuia’n a kaihruai a, an Branch YMA President hmasa ber Pu Thangliana’n hruaitu hlui chawimawina certificate mi 76 hnenah a hlan a ni.
Jubilee lawmna a hmanpui zawh veleh Ratu khaw panin Pu PC Zoram Sangliana hi a kal nghal a. Mi bo zawngtute senso atan cheng 2000 a pe a. East Phaileng YMA Jubilee lawmna a tel tura kal Tuivawl bialtu MLA, Govt. Deputy Chief Whip Pu RL Pianmawia pawh he vanduaina thleng avang hian Ratu khua a pan tlang nghal a, mi bo zawngtute chetvelna thutchilhin engkim a hmunah a buaipui a ni.
