Nimin chawhnu dar 2:00 khan Mizoram Arm Wrestling Association chuan Coconut Grove, Sihhmuiah 35th National Arm Wrestling Championship, Ludhiana, Punjab-a gold medal 1, silver medal 2 leh bronze medal 3 an lakte lawmna hun an hmang a, he hunah hian Mizoram State Sports Council Vice President thar F. Rotluanga chu khuallian a ni a, Sports Writer of the Yean Brian Lalnunhlima chu Guest of Honour a ni.

Arm Wrestling National Championship hi June 16-19, 2011 chhung khan neih a ni a, Mizoram atangin ban elh chak 18 an fehchhuak a, Mizoram hmeichhe team chu a pumpuiah pahnihna an ni. Khuallian Pu F. Rotluanga chuan Mizorama sports association te tana penchhuak anih anga an mamawh hun a piangah an koh leh harsatna thlente dawnsawn a inhuam thu bakah a tul a nih chuan zanlaiah pawh thawkchhuak tura a inhuam thu a sawi.

Guest of Honour Brian Lalnunhlima chuan Mizoram Arm Wrestling Assoication-ten rahbi thar rapa mel lung thar an phun chu lawmpuiin Sports Association hrang hrangte mamawh ber chu inpekna a ni a. Tul leh mamawh huna chhawr theih, pan leh koh theih, (availability) nei tha Sports Association ni turin a chah bawk. Arm Wrestling Assoiciation president PB Vanlalremruata chuan India ramah kan tluk lohte chu Manipur an ni a, ka la tluk thuai dawn a, lehpelh ngei kan tum a ni tiin nakkuma Mizoramin 36th National Arm Wrestling Championship a thlen hunah champion ngei an tum thu a sawi. Medal lawmna inkhawm hi MAWA Vice President in a kaihruai a, medal late hnenah MAWA chuan lawmpuina thilpek an hlan.