Thian Duhtakte u,

Kan hriat theuh angin Armed Forces Flag Day hi India ram pumah kumtin December ni 7 apiangin hman a ni thin a. India sipai huaisen te leh ram chhana nunna hlante chawimawina ni atan leh sipai bang, ram venhim hna thawka an thatlai hun lo seng ral te chibai zahawm buk na ni atan te, ram venghimtu sipai huaisente mipuiten kan ngaihsanzia leh an lamah kan tang tlat ani tih lanchhuah tirna ni atan te hman a ni.

He ni zahawm tak hi Armed Forces Flag Day tih a ni a, he ni ah hian a bik taka siam puanzar (flag) hralh chhuah thin a ni. He ni hi mipuite leh sipaite inlaichinna alo that lehzual nan leh thlamuang taka an thawhho theih nan bakah heng a hnuaia thil pathum te tihhlawhtlin a nih theih nan ram pumah lawm thin a ni:

(a) Sipai indona avanga ramtuileilo a awmten leirem an lo rah ve theih nan
(b) Sipai bangte leh an chhungten in leh lo tha an neih theih nan leh an khawsak a lo nawm zawk theih nan
(c) Sipai tanglai mek te leh an chhungte khawsak nawm theih nan leh hamthatna chi hrang hrang an hmuh theih nan

Armed Forces Flag Day hian India Sipai huaisen ram chhanhim nana nun hlan ta te laka bat kan neih thuk zia min hriat nawn tir fo thin a, Army, Navy leh Air Force sipai huaisen te hi kan thlamuanpui a ni. Nang leh kei hlim leh muang taka kan awmtheihna tur atana an nunna hlu tak an hlan avangin an chhungte baihvai leh rethei takin an awm phah a, sipai tam tak ramtuileilovin, rualban lovin an awm phah bawk a ni. Sipaite hi ram venghimtu dik tak, a sur a sa pawi sa lo, sik leh sa inthlak danglam pawhin a tihbuai ve loh, riltam leh tuihal pawhin an hna (duty) a thulh tir chuan loh te an ni a, Sipai rorum leh tawrhchhel, India ram venghim tura theihna zawng zawng nena inpe te hi an chhuanawmin an thlamuanpuiawm a ni.

Hun ralmuangah chuan sipaite chuan ram chhung inrelbawlna dik kenkawh kawngah roreltute a pui thin a, khuarel chhiatrupna (lirnghing, tuilian, cyclones a dang te) a lo thlen chang pawhin an chipuite (India khua leh tuite) chhanchhuak leh chhanhim turin theihtawp an chhuah thin a ni. Anni hi India ram zahawmna leh ropuina vawng him tu an ni. Armed Forces Flag Day hian indona avanga hmeithaite, ramtuileilova awm te, ram tana nun hlan sipai huaisente chhung leh kuate chunga kan bat, kan tih ngei ngei tur min hriatnawn tir fo thin a ni. Sipai tanglaite leh an chhungte, sipai bangte leh an chhungte, indona avanga hmeithaite leh rualban zo lova awm ta te, hlim leh muang taka kan khawsak theihna tur a an nunna hlu tak hlan tu Sipai huaisen te kalsan tak an chhungte, heng zawng zawng chunga that chhuah a, an khawsak nawmna leh an nun hlimna tur ngaihtuah hi mitinte hian kan tihtur, anmahni chawimawi nan leh zah entir nana kan tih ngei ngei tur a ni.

Heng kan sawi tak zawng zawng rilru a vawng chungin, tun kar chhung hian Mizoram pumpuiah vehbur khawn a ni dawn a. Mizoram chhunga mi zawng zawng, sumdawngte leh Sawrkar hnathawkte thlengin kan ram leh hnam venghimtu pasalthate chawimawi nan in robawm te hawnga in phal ang tawk tawk rawn hlan ve turin ka thinlung takin ka sawm a che u.

JAI HIND