Thian duh takte u,

A hmasa berin Mizorama Ex-Servicemen zawng zawngte Armed Forces Flag Day, 2025 puala chibai bukin inchungah lawmthu ka sawi mawlh mawlh a. He ni hi ram chhan nana nunna hlu tak hlantute, ram inpumkhatna vawnghim tura ramri depa huaisen taka beitu leh la bei chhunzawm zel tur sipaite zahna lantirna ni a ni a. Kum tin he ni hi ram pumah December 7 hian hman thin niin, hmalam hun duhawm tak kan neih theih nana an theihna zawng zawng hlantute zahna lantira, kan hriatreng theih nana ruahman a ni.

Indian Armed Force-te hi kan ram leilung, tuipui leh van boruakte ngawrh taka venghimtute an ni a. An thawhrimna zarah keini khua leh tuite hi ralmuang takin kan mut theih phah thin a ni.

He hun hi remchangah lain Indian Armed Force mi leh sa Mizoamin a chherchhuah tha tak tak, State leh India tihmingthatute hming han lam rik ka duh a. Hun hmasa lama hruaitu hriat hlawh tak takte bakah tun dinhmunah Lt Col Clement Lalhmingthanga (Retired) leh Petty Officer TBC Lalvenchhunga te chu 9th Legislative Assembly of Mizoram-a member ni lai mek an ni a. Mizoram fa hrin Captain Lalrinawma Sailo, 4th Para (Special Forces) chuan August 15, 2025 khan sipai huaisen chawimawina Kirti Chakra a dawng a, chhuanawm ka ti takzet a ni. 

Mizoram thalaite u heng mi hmingtha tak takte hi entawna infuih thar nan hmang tur leh, Indian Armed Forces zawm tura theihna in neih zia lantir turin ka duh che u a. Mizo thalai te'n theihna leh chakna an ngah zia ka hriat hian Armed Forces zawmtute'n hlawhtlinna duhawm tak an chan ngei hi ka ring tlat a ni. 

Mizoram sawrkarin raldona avanga vanduaithlak taka sipai boral chhungte leh ramtuileiloa awm zuite a tuamhlawm dan sawi lan ka duh a. Sawrkar kum kalta leh kal mekah Mizoram sawrkar chuan indona avanga boral leh hliampui tuar chhungte hnenah Rs 15,00,000/- (Cheng nuai sawm leh panga) a sem chhuak tawh a ni.

He ni pawimawh takah hian ram tana nunna hlu tak hlantute zahna chibai buk thar leh theuh ila, an tana kan bat let leh mawhphurhna neihte pawh i hre thar leh theuh ang u. Sawrkar kum kalta leh kal mekah hian Ex-Servicemen leh an chhungkua, an vaiin 23 - damlohna avanga inenkawl ngai 16 leh khuarel chhiatna tawk 7 - te hnenah tanpuina Rs 91,500/- (Cheng singkua sangkhat leh zanga) sem ral a ni. 

Armed Forces Flag Day hi Mizoram pumah tanpuina vehbur khawn nana hman thin a ni a. Heng atanga sum leh pai lo lutte hi tuamhlawm mamawh tak tak Ex-Servicemen leh an chhungte damloh nikhuaa inenkawlna senso atante, khuarel chhiatna tawkte tuamhlawmna leh Ex- Servicemen hamthatna tur atantea hman thin a ni. Ram tan ti a sipaite inphatna hlu tak hre reng chung leh an kalsan takte mala an awm loh nan, Mizoram mipuite Armed Forces Flag Day puala vehbur khawn hi ngaipawimawh theuh tur leh, mahni phak tawka phal taka sum leh pai thawh theuh turin ka ngen a che u. 

A tawp khar nan Kohima War Memorial-a thu inziak, 480 BC-a Thermopylae Indona avanga boral spartan-te chawimawi nana thu ziah zulzuia siam hi ka'n tarlang nawn leh ang e - "When you go Home, tell them of us say, for your tommorow, we gave our today".

Ka lawm e. Jai Hind