Mizoram mipui duh takte u,

Chibai vek u le.

Malsawmna hunpui Krismas boruak kan hman chhoh mek lai leh beiseina nena kan hmuah Kumthar pualin inzavaiin duhsakna chibai thami ka buk vek a che u. Kum dang ang bawkin kan tlangram ngainatawm takte chu carol thawm rivain a tuam chhuak a, kan inpumkhatna chu mawi takin a eng chhuak mek a ni.

Thlasik boruakin kan ram tlang leh ruamte a hrut mek lai hian, khawpui leh zokhuate chu arsi, laltin leh khawtlang inhmangaihna chuan a uap lum mek a ni.

Krismas hi Mizoramah chuan chhungkua anga hun kan hman hona, zonun zemawi ‘Tlawmngaihna’ parchhuahna hun, rinna, inpawlhona leh midang tana luanchhuahna thinlung mitinte'n an put hun a ni.

Krismas hian Isua Krista pianna kaltlanga khawvel tana beiseina nung nei tura chatuan thuchah kan dawn kha min hriat nawn tir leh a. Chanchintha Luka ziakah chuan hetiang hian kan hmu a ni, "Chungnung berah Pathian ropui takin awm rawh se, Lei chunga a lawm em em mihringte hnenah remthu leng rawh se,". 

He hunpuiah hian tunhma zawng aia nasain kan thinlung kawngkharte hawng thar leh ila, mirethei leh chanhai, riangvai, damlo leh baihvaite tana malsawmna nih tum theuh ang u. Kan thil neih ang ang - eitur, silhfen, hun leh tha emaw, nui hmel ringawt pawh ni se i ui lo ang u.  Muanna, hmangaihna leh remthu thlen tirtu nih i tum theuh ang u. 

Mizoram thalaite chakna thahrui, theihna leh duhthusamte hi kan hmalam hun hriltu a nih avangin, he hunpui lo thleng hian in thiamna leh theihnate tipung se, in khawhawi tizauin hmabak eng tak Mizoramin a neiha, India ram chak zawk siam a nih theih nan rah tha chhuah se a va lawmawm dawn em. 

Rual u zawkte finna, tawngtaina leh uapnain kan khawtlang nun kaihruai chhunzawm zel se. Krismas hi kum upate chawimawina, ngaihsakna leh kan tana an hmalakna hlu takte hriat nawn lehna hun a ni. 

He hunpuiah hian chhungkaw tinte lawmna leh remna chuan tuamin Pathian khawngaihna chuan thlamuan se. He hun hi chhan engemaw avanga inhmu thiam lote inngaihdamtawn nante, inlaichinna tih chak deuh deuh nan leh mamawhtute chawmdawl nante hman ni se a duhawm hle ang. 

Kumthar kan chuankai hunah pawh kan inpumkhatna leh mawhphurhnate hi tha takin vawngnung chhunzawm zel ila, khawtlangah inlungrualna leh muanna awm zel se, state hmasawnna leh khua leh tuite tana tha ber tur tinzawnin hma i la chhunzawm zel ang u. 

Kumthar 2026 hi mitin tan hmasawn kum ni se. Hun remchang tha tak lo langin, loneitute leh hnathawktute'n thlawpna hmu se. Kohhran leh pawl hrang hrangte'n khawngaihna leh lainatnain min kaihruai se, kan ram mawi takah remna leh muanna awm chhunzawm zel rawh se. 

Krismas dar ri mawi takin kan tlangram mawi tak a fan chhuah mek lai hian midang chunga ngilneihna thiltih chhete pawhin mi nunah hlimna leh beiseina thar a pe thei tih hi i hre thar leh theuh ang u. He hunpui pual hian Mizo hnahthlak hmun hrang hranga awmte duhsakna sang ber ka hlan a ni. 

India rama boruak thianghlim ber State ni zel thei tura tan la turin mipuite ka chah duh che u a. Mahni mihringpui mai bakah kan vela awm thilnung dang leh leilung tana him lote ti lova hunpui lawm theuh turin mipuite ka chah a ni. 

In chhung luma chhungte kianga hunpui hmang ve thei lo tur midangte tana rawngbawlna hna thawk mek - Dan leh thupek kengkawhtu, ram venhim hna thawktu, Doctor, Nurse leh nitin mamawh phuhru tura duty zawng zawngte zahna chibai ka buk a, inchungah lawmthu ka sawi a ni. In inpekna avangin hunpui hlim takin kan hman theih phah a ni.  

Isua hmangaihna chuan awmpui tlat che u se; Kumthar lo thleng tur hian inchhungkuaah theuh malsawmna rawn thlen mawlh rawh se.  

Mizoram mipui zawng zawngte Krismas leh Kumthar chibai vek u le.