Thian duhtakte u,

Vawiin hian India ram pumah Independence Day vawi 79-na ropui takin kan lawm a. He ni chhinchhiah tlak takah hian Khawzawl District mipuite, Mizoram chhung leh ram pawna mite zawng zawng duhsakna chibai ka buk a che u.

He ni ropui takah hian India in zalenna kan neih theihna tura thi leh thau pawlh a, mahni inphata, nun thapa lo beitu, hruaitu ropui tak takte bakah zalenna sualtute thlawp tlattu mipuite inpekna ropui tak kha kan zavaiin hre thar leh ila. Tha thlah lova ram tana an beihna zarah vawiin hian India ram chu sakhaw hrang hrang zalenna ram, mipui rorelna ram ropui, thang duang tak leh khawvel ramdangte zah kai a ni mek a. Ram hruaitute leh mipuite inpekna zarah hriselna kawngah te, zirnaah te, ei leh bar zawnna kawngah te leh kawng tinrengah India ram pumpui hian hma a sawn nasa takmeuh a ni.

Khawzawl District pawh kum 2019-a a lo din atang khan hma a sawn chak em em a. Sorkar Flagship Programme Hand Holding Policy 'Bana Kaih' hi sector hrang hrangte tihchakna atan duan a ni. He hmalakna pawimawh tak hnuaiah hian kuthnathawktute thei leh thlai tharchhuah lei sak te, a sawngbawl dan tur ngaihtuah te, a hralhchhuahna kawng dap te bakah mahni kutkawih eizawnna leh thiam thil zirna (Skill Development) chawisan te, thalaite tana eizawnna ngelnghet siam thlengin a huam tel a; hei hian small-scale leh agro-based industry-te hmasawnna a pui hle dawn a ni. He Policy hian Sorkar laipui leh State Sorkar programme hrang hrang, hmalakna leh Scheme hrang hrangte a tangkai thei tur ang bera thlunzawm a, thawhhona tangkai siam a tum a. Heng hmalakna ațanga hlawkna hian Targeted Partner-te tuam tir vek a tum a ni. Hemi kaihhnawihah hian Agriculture tharchhuah te hlawk zawka hralhchhuah a nih theih nan a sawngbawlna turin MIFCO, Chhingchhip pawh tuai thar leh a ni a. Khawzawl District chhungah Bana Kaih Policy hnuaiah Progress Partner mi 31 awmin CM Special Package hnuaiah Progress Partner mi 116 an awm.

Department hrang hrang - Agriculture and Farmers' Welfare Department te, Horticulture Department te, Commerce and Industries Department te, Irrigation and Water Resources Department te, Fisheries Department te, Animal Husbandry & Veterinary Department te, Rural Development Department te, Sericulture Department te, Land Resources, Soil and Water Conservation Department leh KVK hnuaiah te kuthnathawktute tihhmasawnna leh hamthatna turin Scheme hrang hrang hnuaiah nasa taka hma lak a ni a. Kuthnathawktute hriatna leh thiamna. belhchhah turin training hrang hrang pek an niin thali chi leh thali tiak chi hrang hrang sem a ni a, chhungkaw tamtak hnenah tanpuina pek a ni. Kut hnathawktute hnathawhna hmunhma tichangtlung a, tihmasawn turin kawng hrang hrang hma lak a ni bawk. Loneitu chhungkua 3501 ten PM Kisan hnuaiah cheng nuai 279.64 an dawng tawh bawk. Loneitu chhungkaw 2738 te ram leilung enfiah sak an niin Soil Health Card pek vek an ni a, Tualpui Khuaah chhungkaw zachuangin tin zathum aia zauah Tung an ching mek bawk.

Kuthnathawktuten an thali thar chhuahte felfai leh hlawk zawka an hralh a, kum tin harsatna tawk lova ruahmanna leh kaihhruaina awmsa hmanga an hmuh tur zat hre lawka thali a chin theih nan thali thar hralhna mumal tak leh ngelnghet tak siam mein theihtawpa hma lak mek zel a ni a. Village Council zawng ze 2/4 Multipurpose Farming Society din vek a ni a. District tina District Agriv Marketing Committee kaihhruaina hnuaiah Secondary Collection Centre kaltlangın heng thali thlan chhuah bik - Sawhthing, hmarcha, aieng leh hmunphiah te hi lei a ni a. Khawzawl District hi sawhthing hralh tam ber district in ni thei hi in chhuanawm ka ti takzet a ni.

Hmasawnna ruhrel lian tham din kawngah pawh chak taka hmalak a ni a. Public Works Department-in hmun hrang hrangah kawngpui sial hna leh thawmthat hna chak takin kalpui a ni a. Kawlkulh to Vankal road (12.98 km.) thawh zawh tawh a ni a, Kawlkulh to NE. Bualpui road (24.00 km.) thawh mek a ni bawk. Community Multipurpose Hall, Khawzawl Zuchhip Vengah leh Auditorium, Khawzawl Vengtharah te sak mek a niin Biate Tea Tourism and Nature Camp pawh thawh mek a ni. District Panchayat Resource Centre sak mek a ni a, Tourist Lodge pawh hman theiha peih fel a ni tawh bawk.

Khawzawl District-in hma a sawn zel theihnan ruahmanna chak taka kalpui a ni a. Excise and Narcotics Station hawn fel tawh a ni a, District Transport Office pawh hawn thuai tum a ni. Cheng vaibelchhe sawm senga Circuit House sak hna pawh tan chhoh mek a ni a, District Court leh Judicial Qurters hmun tur pawh ruahman fel tawh a ni a, hna tan thuai theih beisei a ni. Information chak zawka kan inpek zung zung theihnan Deputy Commissioner Office-ah NIC District Centre bun fel a ni tawh a, BSNL Tower din thuai tum a ni bawk.

Hriselna kawnga hma kan sawn theihnan nasa taka hma lak a ni a. Khum 50 awm theihna tur District Hospital leh Medical Quarters te sak mek a ni a, Khawzawl District tan Chief Medical Officer dah fel ni tawh bawk. District Hospital Complex-ah Patience Attendance Shelter sak mek a ni a. Kumin September ni 19 hian Khawzawl-ah Multi-Speciality Clinic buatsaih tum a ni a, Specialist Doctor thiam tak tak engemawzat an rawn kal dawn a, he hun hi Khawzawl District mipuiten in lo chhawr tangkai ngei ka beisei.

Kawlphetha hnianghnara kan dawn theih nan nasa taka hma lak a ni a. Tualpui Village Power Supply pekna line leh a ban te cheng nuai za sawmpathum leh singkua sangli sengin thawh zawh tawh a ni a, Kawlkulh khaw chhunga Power Supply pek chhuahna hmunpui cheithat leh tihchangtlun hna pawh cheng nuai zahnih sawmhnih pasarih leh singnga sengin thawh zawh a ni tawh bawk.

Tui thianghlim, hnianghnar taka mi tinin kan dawn theihnan PHE Department-in nasa takin hma a la a. Jal Jeevan Mission hnuaiah Khawzawl District chhunga thingtlang khua 25-a in 4910-ah household tap connection pek vek tawh a ni a, khaw pariatah Solar Pumping hmanga tui pump chhuah a ni. NABARD hnuaiah Ngaizawl khuaah Solar Pumping hmanga tui pump chhuah hna thawh zawh tawh a ni a, Hmuncheng Solar Pumping Scheme pawh trial run neih mai theih tura ruahman fel a ni tawh a, Tualpui Water Supply Scheme pawh hna tan thuai theih tura chak taka hma lak a ni.

Zirna hi hmasawnna tehfung pawimawh tak pakhat a ni a, zirna tha zawk kan neih theihnan theihtawpa hma lak a ni. Eklavya Model Residential School, Khawzawi Darngawn venga din tur pawh Prime Minister zahawm takin lungphum a phum tawh a, hna hi tan chhoh mek zel a ni. Khawzawl District chhunga zirlai 2698 te hnenah a thlawnin uniform leh zirlaibu pek an ni a, zirlai 3989 te hnenah Mid-Day Meal pek an ni bawk. DIET Building cheng 3,71,17,903.98 man sak mek a ni a, Rabung Higher Secondary School Building cheng 1,11,17,354.27 man sak mek a ni bawk.

Him leh lungmuang taka an khawsaqk theihnan PMAY(U) leh PMAY(G) hnuaiah chenna in nei lote tan in engemaw zat sak sak tum a ni a, faina leh thianghlimna kawnga hma kan sawn theihnan nasa taka hmalak a ni a, Khawzawl-ah Solid Waste Management Centre din hna pawh thawh tan mek a ni. Khawzawl District hi hman khat daih plastic hman lohna district-a siam tuma theihtawpa hma lak a ni a, thingtlang khaw 25 te hi Open Defe3cation Free Plus (ODF+) an ni vek tawh a, heng khuaah te hian Community Soak Pit te, Composed Pit leh Plastic Collection Centre te sak vek tawh a ni a, Kawlkulh khuaah Plastic Waste Management Unit sak mek a ni bawk. UD&PA buatsaih "District Beautification Competition, 2025" a lawman pakhatna, cheng nuai 50.00 dawn hmangin Khawzawl Town cheimawi hna thawh mek a ni.

Ruihhlo do hna hautak tak mai chu chak zawka kalpui zel a ni a. Kumin chhungin Cheng Nuaih 87.43 man hu ruihhlo man a ni tawh. Ruihhlo sumdawnna hi thiat tur chuan NGO, kohhran leh tlawmngai pawl hrang hrangte nen kan thawhho a tul a ni. Chak zawka hma kan lak theih nan District Level Committee on Ruihhlo Do te, District Level NCORD te din a ni a, Nasha Mukh Bharat Abhyan hnuaiah te nasa taka hma lak a ni. Dan lova kuhva ro lakluh bag 1746, cheng nuai 404.64 man hu man a ni bawk.

Thian duhtakte u, Khawzawl District chhunga hmasawnna zawng zawng hi sawi vek sen a ni loving. Village Council General Election, 2025, muanawm leh tluang taka kan han nei thei te, Dan leh Hrai, Thupek leh Thuchhuah tha taka kenkawh a ni te, District ralmuang leh muanawm kan ni te hi Magistrate, Police, tlawmngai pawlte, kohhran, thuthar lakhawmtute leh tun sorkara rinna leh beiseina nghat ngamtu mipuite chungah lawmthu ka sawi bawk a ni.

A tawp berah chuan vawiin Independence Day lawman atana rim taka thawktu zawng zawng te chungah te, Parade Contingent-te, zirlaite leh mipui lo kal khawm zawng zawngte chungah lawmthu ka sawi a. He hunah hian zalenna kan neih hi vawng him a, kan ram neih chhun hian hmasawnna hmel thar a hmuh theih nan lungrual taka thawhhopuiah ka sawm che u a. Mizoram-in hma a lo sawn deuh. deuh nan leh India in ram changkang - Viksit Bharat nih a tumna tihlawhtlingtu kan ni theuh dawn nia.
Ka lawm e
Jai Hind