Vawiin khan Art & Culture Minister Pu R.Lalzirliana chuan Art and Culture Department leh Mizo Writers Association te tangkawp buatsaih Book Fest cum Writers Meet 2019 chu Aizawl Vanapa Hall-ah a hmanpuiin lehkhabu chhiar ngaisang tur leh uar turin Mizo mipuite a sawm.

Pu R.Lalzirliana chuan Mizo Writers Association ten Book Fest cum Writers Meet, 2019 an huaihawt chu fakin ram changkang zawkin an uar leh ngaihhlut em em, a pawimawhna leh hlawkna hrethiam a program buatsaih a ni chu lawmawm a tih thu a sawi a. He Book Fest hian Mizo Writers Association member-te phurna thar a siamsak ngei a beisei thu te, member lo ni tawhsate piah lamah, member ni ve chiahlo, ziak mi thu leh hla lama tui tak tak te tan te leh lehkhabu chhiar ngaihlutute tan pawh malsawmna leh tuina thuk zawk petu a nih ngei a beisei thu a sawi. Literature chungchang sawiin Art and Culture Minister chuan tun hma lamah kha chuan Literature hian ziaka thil dah - lehkhabu leh lehkhathawnte a huam a, khawvel changkang zelah  literature huang chu tihzau lehzual niin, zai leh thusawi thlengin literature huangah rin luh a lo ni ta a ni, a ti a. Tunlai ziakmite chuan kan ngaihtuahna leh riruatna te, poetry te, kan duhthusam (Fantasy) lam te leh kan rilrem zawng thu leh hla te phuaha ziakin lehkhabu kan siam theih bakah hnam dang tawnga ziak tha tak tak kan let (translate) thei ta mai hi kan vanneihzia tilang tu pawimawh tak a ni, a ti. Lehkhabu chu sawi loh chanchinbu takngial pawh chhiar nachang hrelo kan pung nasa lutuk leh Social media lamah kan tlan nasa lutuk hi veiawm a tih thu Pu R.Lalzirliana chuan a sawi a. Nu leh pate bakah kan thalai rual, kan ram nghahfakte hian lehkha chhiar hi kan uar a tul takzet a ni, tiin Minister chuan lehkhabu chhiar ngaisang tur leh uar deuh deuh turin Mizo mipuite a sawm a. Lehkha chhiar hian kan thlirdan leh kan rilru sukthlek min kaihruai a, kan thluak tan insawizawina min siamsak a, finna leh hriatna tihzauna hmanrua pawimawh tak niin ziak lama hmasawnna bakah ruahmanna leh ngaihruat thiamna min siamsaktu tha tak a ni, a ti.

Ni 6 awh tur he festival hi August ni 12 khan neih tan niin hemi ni hian lehkhabu dahluh a ni a, lehkhabu engngemawzat man man zawka zawrh chhuah a ni. Vawiin atanga tanin ni nga chhung Vanapa Hall-ah nitin programme buatsaih a ni dawn a, hetah hian Mizo ziakmi hriathlawhten an lehkhabu ziah dan sawiin zawhna leh chhanna hunte an hmang thin dawn a ni. Vawiin programme hi MWA President Pu R.Lallianzuala’n a kaihruai a. Lehkhabu ziah dan chanchin mi paruk - Pu B.Lalthangliana, Pu Vanneihtluanga, Pu Lalrammawia Ngente, Pu Lalzarzova Khiangte, Prof.Laltluangliana Khiangte leh Pi Romuanpuii Zadeng te hnen atangin ngaihthlak a ni.

Art and Culture Minister Pu R.Lalzirliana chuan vawiin programme-ah hian lehkhabu pakua a tlangzarh nghal a. Chungte chu - Mizoram GK Mini Edition - Vol.4 by Lalhmachhuana Zofa, Whatsapp Fiamthu by Lalhmachhuana Zofa, Mizo Thawnthu Vol.8 by Lalhmachhuana Zofa, Allah aiah Isua by Lalrinzuala Pachuau, Mizo Literature (3rd Edition) by B.Lalthangliana, Engtin awm ta zel ang maw by B.Lalthangliana, The Man Eaters of Tsavo by Lalzarzova Khiangte, Nupa Hlim Nan by C. Laizawna leh Hmangaihzuali by C.Laizawna te a ni. Heng lehkhabu te hi a then chu kumin a ziah la tlangzarh loh te, a then chu chhutnawn te a ni.