Vawiin khan Information & Public Relations Department Joint Director Pu C.Lalnunkima chuan Quarterly Statistical Bulletin, Aizawl District Issue hmasa ber chu District Research Officer’s Officer, Directorate of Economics & Statistics Department Building, MINECO-ah a tlangzarh a. Quarterly Statistical Bulletin Issue hmasa ber thlangzarh inkhawm hi Pu Lalthlamuana Fanai, District Research Officer-in a kaihruai a ni.

I&PR Joint Director Pu C.Lalnunkima chuan sum tlemte hmanga Bulletin sawrkar leh mipui tana tangkai tur buatsaih a ni chu lawm awm a ti a, Bulletin hi bul tan a nih angin tluang taka chhuah zel turin duhsakna a hlan a, District Research Officer te hi midang hriat lar vut nilo mah se, sawrkar leh mipui tana hna tangkai tak thawk thin an ni, tiin a sawi a ni.

Quarterly Statiscal Bulletin of Aizawl District hi June 2019 Quarter atang hian a vawikhatna atan buatsaih. Bulletin hi phek 6 niin, line department hrang hrang hmalakna tum khatah telh vek a ni lo a, amaherawhchu line department hmaih a nih loh nan tum khat chhuakah department pathum vel telh ziah tum a ni.

He bulletin in a tarlen danin June Quarter (April-June, 2019) chhung khan lirthei dan bawhchhia 1,527 Traffic Police ten an man a, heta tanga chhiah an hmuh zawng zawng hi Rs 686,200/- a ni. Motor ruk bo hi April thla khan Case 8 register a ni a, May thlaah 14 leh June thla khan 12 a ni bawk a ni. Chhiah hrang hrang (Sales Tax, Professional Tax, GST etc) atanga sum hmuh dan chu April thlaah Rs. 2652.008 lakh a ni a, May thla khan Rs 2681.604 lakh leh June thla khan Rs 1215.773 lakh a ni. Heng bakah hian Aizawl District chhunga Consumer Price Index leh Meteorological Data te pawh tarlan a ni bawk a ni.