Vawiin khan SCERT Auditorium Chaltlangah Primary School leh Middle School zirtirtu atana lak tharte tan ni hnih chhung awh tur induction training hawn a ni a, School Education Minister Pu Lalchhandama Ralte chuan khuallian niin he hun hi a hmanpui.
   
School Education Minister chuan he induction training hawnnaah hian thusawiin sorkarin aikal lak a phal lova, aikal lak tumte chu an hna atanga inthiarfihlim turin a hrilh. Minister chuan tun hnaia MPSC kaltlanga Primary leh Middle School teacher atana lak thar mi 153 te chu an hna an zawm veleh an awmna hmuna tha taka awm nghal chat tam tak an awm laiin mi 4/5 vel chu hna an zawm hnu lawka aikal lak tur melh nghal leh transfer kherh nghal an awm tih a sawi a. Thingtlang hmun hrang hrangah mamawhna avangin dah an ngai a, anmahni post theuhah lungawi a, an mission field a ni tih pawm tur leh zirna siamthatna kawngah koh an nihna hmun a ni tih pawm turin a chah a ni.
   
Pu Lalchhandama Ralte chuan zirtirtu lak tharte chu hun vawng dik a, school tan hun dar 9 chu ngai pawimawh turin a chah a, tan hmaa naupangte lo chiauau hman tur leh school compound vela naupangte che vel pawh thlithlai fo turin a chah a ni. Zirtirtu inthuamna leh nihphung tur awm ang renga inchei tur te, zirtirtu hna chu hna zahawma siam turin a fuih a ni. Zirtirtute zingah khawlaia zu rui sawi tur an awm leh zauh thin tih sawiin chutiang zingah chuan tel lo tur leh zuk leh hmuam, ruihtheihthilah  leh zirtirtu tih atana mawi lovah te inthiarfihlim turin a fuih bawk a ni.  Minister chuan tun hnaiah zirtirtu zingah anmahni ngeiin Minister chu hmua transfer dil ta ngawng ngawng an awm a, hei hi tih loh tur a ni a, Minister hnen thlen ngai anih pawhin dan anga dilna siam turin a hrilh a, an thawhna school building theuhte chu  ka ta tihna thinlung neia enkawl turte, a bula mite rawn nek tur laka lo humhim te a tul a ni a ti a. School ram nek an awm anih chuan thuneitute hnena thlen vat turin a chah a ni. Minister chuan tun hmain zirtirtute hi khawtlangin neituah an ngai a, sorkar hnathawk pangngai aiin an dah sang thin tih sawiin chu dinhmun chu vawng nung tlat turin a fuih a. Naupangte thinlungah Mizo nationalism te, aia upa zah te leh nundan phung te tuh fo turin a fuih a, an mawhphurhna pawimawh tak hnam siam that nana a pawimawh laia thu an nihna hre reng turin a chah a ni.
   
Induction Training hawnna hi School Education Director Pi Lalzarmawii IAS-in a kaihruai a, Director chuan naupangin hma lam hun eng tha tak an neih theih nan nuam ti taka zirtirna an dawn a ngai a, chuvangin zirtirtute chu naupangte chawk phur a, an future siamsaktu ni turin a fuih bawk a. Pu K.Laldingliana MCS Additional Director chuan lawmthu sawina hun a hmang a ni.
   
Ni hnih chhung awh induction training-ah hian conduct rules leh departmental standing order te, Integrated Evaluation Scheme te, question setting te, Use of ICT, teaching aids, practical class te leh an service atana pawimawh chi hrang hrangte an zir dawn a ni.