Vawiin hian Serchhip District Level Standing Committee on Electoral Revision te chu an chairman Pi Sangchhin Chinzah, District Election Officer hovin an thukhawm a. Election Commission of India in Electors Verification Programme (EVP) thar a rawn duan chhuah kalpui dan tur leh Special Summary Revision of Electoral Roll, 2020 kalpui dan tur an sawi hova, Plitical Party hrang hrangte hnena inhrilhhriatna hun a hmang nghal bawk.

Chairman Pi Sangchhin Chinzah chuan, khua leh tui dik tak ten ram hruaitute an thlan ngei theih nan Election Commission of India chuan nasa takin hma a la reng a, thil tha zawk leh fel fai zawk a awm theih nan hmalakna thar pawh a duang zel a. Vawiinah pawh Elector Verification Programme (EVP) rawn duang tharin hei hi Elector ten internet kal tlanga an chinchang E-Roll a chuang a dik leh dik loh an inenfiah mai theihna thil leh diklo a awm chuan awlsam taka siam that theihna tur ruahmanna a nih thu a sawi a. Tin, Electoral Roll Special Summary Revision 2020 neih chhoh turah tlawmngaipawl leh mipuite thawhpuina a sawm bawk.

Election Officer Pu Vanlalhmachhuana’n Electors Virification Programme leh Special Summary Revision neih dan tur kimchang sawifiahna hun a nei bawk a. EVP ah hian Electors ten internet kaltlangin Mobile App ah chuan Voter Helpline download theih a ni ang a, anih loh pawhin NVSP portal ah website a luhin emaw Common Service Centre kaltlangin emaw Voter Facilitation Centre ah te emaw, PwD electors tan chuan voter help line Number 1950 biakpawhna kaltlangin E- Roll a an hming leh an nihna felhlel awm te an enfiah mai thei dawn a, siamthat an duhte chu dilna an siam mai thei dawn a ni. Chung an dilna te chu BLO in a umzui anga, AERO leh ERO ah te a tul angin kalpui zel a ni ang.

Special Summary Revision hi Election Commission chuan 15.10.2019 ah Draft Roll Publish in hunbi an rawn thliah a. Claim & Objections hi 15.10.2019 atanga 30.11.2019 thlenga thehluh theih a ni ang a, hemi hun chhung hian Special Campaign kalpui a ni bawk ang. Claims & Objection te chu 15.12.2019 ral hmaa chin fel vek tur a ni ang a, 25.12.2019 hmain Final Publication phalna neih hman tur a ni ang. Ni 31.12.2019 ah Final Roll chu data base ah dahchhuah a ni anga, ni 1.1.2020 atanga 15.1.2020 inkarah ah Final Publication neih a ni anga, ni 25.1.2020 (Voters Day) ah elector tharte hnenah EPIC thar hlanna hunte pawh buatsaih leh tur a ni ang.

Special Summary Revision atan hian Serchhip District-a thawktute pawh training te neiin an inbuatsaih chho mek a, engkim a hun takah, fel taka kalpui zel thei turin ruahmanna siam a ni.

Vawiina meetingah hian Standing Committee members te, Political Party aiawhte leh ERO/AERO te an tel tha hle a ni.