4833/2024-2025

Dungtlang, 26th March 2025: Vawiin khan Dungtlang khuaah Art & Culture Minister Pu C.Lalsawivunga leh Health Minister Pi Lalrinpuii hovin Thangchhuah Lungphun, Lianchhiari Lungphun leh Pasaltha Lalhmingliana Lungphun hawnna hun hman a ni a. Thangchhuah lung hi Pu Lalduhoma, Pu Zoramthanga, Pi Lalrinpuii, Pi B.Sangkhumi, Pu David Zohmangaiha leh Jeremy Lalrinnunga te hminga phun a ni.

Art & Culture Minister Pu C. Lalsawivunga chuan he hunah hian pi leh pu te zahna chibai bukna thu sawiin, vawiina a lungphun an hawn tak a pu Pasalṭha Lalhmingliana hmingin kalkhawmte chibai a buk a.  Pasalṭha Lalhmingliana chuan Tumpang sial chu muzuk feiin a chhun hlum a, nau awih hlaah “Tumpang siali a vawr e Lalhmingliana’n” tih lo chhuah chhan anih thu a tarlang a ni. Art & Culture Minister hian tunhnai khan Dungtlang Sangsarih khua pipu hmun hlui atanga ruhro laihchhuahte chu engtik hun ami nge an nih tih hriat nan Carbon dating tih a ni a, a result aṭang chuan heng ruhrote hi kum 1740-1480 AD hun lai ami ni a hriat a ni a, DNA pawh tih leh tura hmalak mek a ni bawk tih a tarlang a ni. 

Minister chuan Mizo hnam nunphung leh chin dante humhalh zel a ngaih thu sawiin hawihhawmnate, tlawngaihnate leh aia upa zahna kawngahte puanven kan sawichhin zel a tul hle a ni, a ti a. Hnam changkang apiangin an pipute sulhnu leh hmunhmate an ngaihluin an humhalh thin a, keini zofate pawhin kan pipute nun zemawi leh sulhnute kan ngaihlut zel hi a ṭul hle a ni, a ti bawk. Khualzin mite tana hmun hlu zawk a nih zel theih nan Dungtlang khaw chhehvel chei ṭhat chu sawrkar pawhin a ngaipawimawh zel a ni, a ti. 

Health Minister Pi Lalrinpuii chuan he hunah hian Mizoram sawrkarin pawisa ngai lova inenkawlna - Mizoram Universal Health Care Scheme a kalpui dawn ta tih sawiin, sawrkarin hriselna kawngah hma nasa takin a la mek zel tih a sawi bawk a. Dungtlang leh a chhehvel khua te chu sawrkar hmalakna te ngaihvena a chhawr ṭangkai ber tu ni turin a sawm a ni. Tourism Minister ni bawk Pi Lalrinpuii chuan khualzin mite hip kawngah khawchhak tlangdung khua ten hma la zel se duh thu sawiin, pipu sulhnu leh hmun hlui te humhalh zel turin a chah a ni.  

He hun hi Pipu Sulhnu Humhalhtu Pawl Organising Committee buatsaih niin kum 1997 khan mi 52 te thangchhuah lung an lo phun tawh a, vawiina mi parukte nen helai hmuna thangchhuah lungphunte hi mi 58 an tling tawh a ni.  Organising Committe lam chuan Mizo hnam tana mi hming tha te tan he Thangchhuah lung hi phun zel an tum thu an sawi bawk a ni. Minister-te ho hian Dungtlang 7000 khaw hmun hlui fanna hun hman a ni bawk.