4831/2024-2025

Champhai, 26th March 2025: Vawiin chawhma dar 11:00 khan Mizoram Journalists’ Association chuan I&PR Auditorium, CHANEM Building, Champhaiah General Conference vawi-51-na an hmang a. Home Minister Pu K. Sapdanga chuan he hun hi khuallian niin a hmanpui a ni.

Pu K. Sapdanga chuan he hunah hian thu sawiin Mizoram Journalists’ Association chu pawl hlun leh pawimawh tak - an eizawnna hmanga khawtlang rawngbawltu leh sawrkar khalh ngil ṭhin tute awmna a ni, a ti a. MJA hruaitute kaihhruaina hnuaiah General Conference vawi 51-na hial thleng theia an awm chu ropui a tih thu sawiin, ze hloh miah lova hei chen an kal thei chu thil chhinchhiahtlak tak a ni, a ti bawk.

Home Minister chuan thuthar thehdarhtute chu Democracy sawrkar lungphum palina (4th Estate of Democracy) an nih angin, sawrkar fakna ziak kur nguai lova, a kal dan dik lo te ziak a, fakseltu ṭha ni zel turin a chah a. “Thuthar thehdarhtute hnen aṭanga sawrkar fakselna ka hmuh hian ka lawm ṭhin a ni,” a ti. Pu K. Sapdanga chuan Mizoram mamawh ber chu siamtharna (reformation) ni a a hriat thu sawiin, he mi kawngah hian MJA member-te chu ṭan la thar turin a chah a. Khawtlang kal dan siamṭhat kawngah te, politics leh mipuite rilru sukthlek siamṭhat kawngah te chanchinbumi te chu thawhhlawk thei ber tura a ngaih thu pawh sawiin, Home Minister chuan ziak ngeia dah thu chuan chungchuanna bik a nei a ni, a ti.

Pu K. Sapdanga chuan Digital Media chak tawh tak karah Print/Traditional Media ten harsatna an tawk mek a ni tih a hriatpui thu sawiin, heng karah pawh chanchinbu tichhuak a, soft copy tal pawha an chhuah ṭhin chu fakawm a tih thu a sawi a. Chanchinbu sem leh tih chhuah dan chu eng pawh ni se, a enkawltute ngaihtuahna leh thawhrimna lang ṭhin hi a ropui ber lai chu a ni, a ti. Home Minister chuan Print Media-in hlutna leh tlona danglam bik tak a neih avangin, khawvelin ziaka dah ngei media hi a mamawh hun a thlen leh ngei a beisei thu a sawi bawk a ni.

MJA President Pu C. Lalrambuatsaiha pawhin he hunah hian Mizo hnam inpumkhat a pawimawh thu a sawi a. MJA member-te chu teirei peihna leh insumtheihna nei turin a fuih bawk a ni.

MJA General Conference vawi 51-na hi Pu C. Lalhmachhuana, Vice President, MJA General Headquarters in a kaihruai a. Kum 2024-25 chhunga member boral - Pu Lalhmingmawia, Editor, Pasalṭha, Champhai Cable Network neitu ni bawk te; Pu Johan Lalhmunmawia, DDK Stringer, Lunglei; Pu TC Lalmuankima, Reporter, Akashvani Aizawl leh Pu H. Lalngaihawma, Editor, Hnehtu te sunna hun hman a ni a. Prominent Journalist thar Pu K. Zothankhuma, Editor, Virthli; Pu T. Lalhmachhuana, Editor, Dingdi leh Pu CS Chawngchhuma, Editor, Hnamdamna te hnenah chawimawina pek a ni. Journalist Pension-te hnenah ngaihhruina thilpek hlan a ni bawk.