4832/2024-2025

Aizawl, March ni 26, 2025: UD&PA department buatsaih Sikul Bungraw Inthleng Runpui – Reduce, Reuse, Recycle Centre – RRR Centre hmuna neih chu tunah hian District khawpui zawng zawngah kalpui mek a ni a. A bultanna atan Aizawl ah March ni 19, 2025 khan UD&PA Minister Pu K. Sapdanga’n khuhhawngin, Centre pasarih (7) ah RRR Centre hi March ni 19 atanga ni 21 chhunga kalpui a ni a. Ni 24 atang khan UD&PA Sanitation Site Office, Solomon’s Cave Opposite ah March ni 28 thlenga hawn turin pawhsei leh a niin, March ni 26 atanga ni 28 thleng District khawpui tinah kalpui a ni bawk ang.

Aizawl khawpui bikah Sikul Bungraw Inthleng Runpui neih chhung ni thum (3) chhungin mi 1000 chuangin tlawh tawhin, sikul bungraw hlui thawh zat hi 7172 niin, lak chhuah zat hi 3346 a ni a. Hun pawhsei leh a nih hnu March ni 24 atanga vawiin thleng hian sikul bungrua 263 lut tawhin, 678 lak chhuah tawh a ni.

Sikul Bungraw Inthleng Runpui hi mipuiten an hlut hle a, sikul mamawh hluihlawn tawh bawlhhlawha chang mai tur te a hmang tangkai tur te hnen ngei a thleng thei a. Mamawh tih tlema bawlhhlawh ngah lo turte, hluihlawna bawlhhlawha chang mai tur hman nawnna tur ngaihtuah dan te, bawlhhlawha chang tur thawmhnaw leh bungrua hmantlaka siam danglamna (recycle) kawngah mipui ten hmasawnna leh ngaihtuahna thar kan neih ngei theihna tura inzirtir hi he ‘Swap & Save’ in a tum a ni.