4834/2024-2025

Lunglei, 2025 Vau thla ni 26: Vawiin khan Mizoram Bana Kaih (Handholding) Scheme hnuaia Lunglei District huam chhunga trade hrang hranga progress partner tura thlante tan Lunglei DC Conference Hall-ah orientation training buatsaih a ni.

Lunglei DC office huaihawta he hun hman hi District Bawrhsap Pi Navneet Mann chuan hmanpuiin, training hawnna thu a sawi a. Bana Kaih chu Mizoram sawrkar flagship programme a nih ang leh ei leh bara hmasawnna atana ruahmanna pawimawh tak a nih angin a hlawhtlin ngei theih nan sawrkar hna thawkte bakah a scheme chhawrtu tur mipuite'n mawhphurhna lian tak an neih thu a sawi a. Trade hrang hranga progress partner tura thlante chu sawrkarin anmahnia rinna a nghah ngam ang ngeia hlawhtlin tuma theih tawp chhuah turin a chah a ni.

He hun hi Lunglei Sub-Divisional Officer (Sadar) Pi TT Beikhaizi chuan a kaihruai a. Lunglei Assistant District Agriculture Officer Pu K. Lalrinfela (Handholding Scheme sawi zauna), Lunglei District Horticulture Consultant Pi Liansangpuii Pachuau (Entrepreneurship chungchang sawi fiahna), MRB Regional Office Lungleia Manager (Processing) Pu T Ginbiakson (Bank Loan, Finance & Bank Scheme sawi fiahna) leh Govt ITI, Lungleia Principal Pu Rosangkima (Accounting, Book Keeping leh Day Book chungchang) te'n progress partner-te tana hriat tur pawimawh hrang hrang an zirtir a. Zawhna leh chhanna hun hman niin, progress partner-te hnenah certificate hlan nghal a ni bawk.

Mizoram Bana Kaih (Handholding) Scheme hnuaiah hian Lunglei District huam chhungah progress partner atana thlan mi 50 an awm a ni.

Attachment

  • Loading attachment...