8th Umang Festival -Vohbik naupang te pual deuh bik programme kharna vawiin khan Pi Zaii Hall,Synod Conference Centre, Mission Veng ah Art & Culture Minister Pu R. Romawia hovin hman a ni. North East Zone Cultural Centre (NEZCC) Dimapur, Ministry of Culture, Govt. of India leh Art & Culture Department, Mizoram te tangkawp in a buatsaih Umang Festival hi 19th – 21st September, 2017 chhung hian hman ani a. Aizawl chhung School hrang hrang paruk atangin he Kut ah hian an tel a ni.
Nu leh pa thenkhat mahni fate ngei enkawl tha peih lo leh hlamchhiah an awm laia naupang enkawl ngai bikte enkawltu pawl leh mithiam tak tak enkawltu leh zirtirtu an awm chu vanneihthlak leh lawmawm a tih thu sawiin khuallian Pu R Romawia chuan an thiamthil hlu leh nalh tak tak vawiinah phochhuah a ni te, an aw mawi leh lam hmuhnawm takte vawiinah hmuh leh ngaihthlak theih a ni chu lawmawm a tih thu a sawi .
Tun hma chuan Rualbanzolo te chu nuihzat leh biak nawmnah an hlawh hle, tunah erawh chuan duat leh uluk taka enkawl leh zirtir an ni tawh in,mi thiam tak tak ten an kaihruai tawh a, a lawmawm tak zet a ni tiin Art & Culture Minister chuan mihring te hi rilru leh taksa, pian hmang te in ang veklo mah ila, Pathian in a duh taka a siam te zinga mi kan ni vek tih hriat a tul thu a sawi a. Pianphunga rualbanlote aiin rilru lama rualban lo kan pung chho ta tlat mai hi a pawiin inven a pawimawh thu Pu R Romawia chuan sawiin pumrua pangai tak si, hnathawh tum tlat lo, kutdawh rilru put tlat te hi a hrisel lova, rilru hi tih piansual loh tur ani a, mi pangai tak tak inenkawlna Home hrang hranga awm a ngai te hi a vanduaithlak a, rilru hrisel put tum tlat tur ani a ti bawk.
Secretary, Art & Culture Department Pi Thanhliri Pachuau kaihhruai Umang Festival kharna programme ah hian Pu F Lalthanmawia, Archivist & Camp Director chuan Brief report pe in Umang tawngkam chu Sanskrit a niin mawi emaw nalh emaw sawina a nih thu leh hmeichhia leh mipa naupang te hmingah pawh puttir a nih thin thu Mizoramah chuan kum 2009 atanga hmantan a nih thu a sawi.
Pu R Hmingthanzuala,Director, Art & Culture Department chuan kalkhawmte hnenah lawmthu a sawi a. Vohbik naupang ten Special Item hrang hrang neia entir in zaithiam zaite ngaihthlak a ni.
