State Level Cleanliness Week Committee (SLCWC) chu vawiin khan an Chairman Pu Zodintluanga, UD&PA Minister hovin a pisaah faina hapta hman dan tur an rel.
Cleanliness Week hawnna inkhawm hi October ni 2, Thawtanni zingah Aizawl Sipai Lammualah neih tum a ni a, District Headquarters dangah DC hova neih tur niin khawpui dangah chuan hawnna inkhawm hman dan tur hi Town Level Committee ten an rel ang. Kharna inkhawm hi Aizawl khawpuiah chuan Aizawl Municipal Corporation kaihhruaiin October ni 9 ah neih tum a ni. Khawpui fai inelna 2017 buatsaih niin khawpui hrang hrang ten ngawrh takin khawpui thenfai hna an tawh mek a, tunah hian endiktu thlanchhuah ten khawpui fai endik hna thawkin lawmman hi October ni 2 ah sem tum a ni. Aizawl Municipal Corporation pawhin faina inelna hi buatsaihin Cleanliness Week kharna inkhawm October ni 9-ah hian veng fai lawmman an sem dawn bawk a ni. October ni 6-ah Cleanliness Week pual hian sawrkar office leh zirna in ten an hmunhma theuh an tifai ang a. Veng hrang hrangah pawh a remchan dan angin he Week hun chhung hian khawlai thenfai hnatlang neih nise tiin an rel.
October ni 2 hian khawtlang thianfai tura tum khata thawk chhuak hnem ber “Largest number of volunteers in community work on cleanliness” World Record siam tum nise tiin hemi atan hian UD&PA leh tlawmngai pawlten hma la se tiin an rel a. Aizawl khawpui chauh nilo Census Town tinah hei hi neih tum niin khawtlang tifai tura thawk chhuak zat hi chhiar vek tum a ni.
October ni 2, 2017 atanga tanin October ni 1, 2018 thleng hi Cleanliness Year atana hman nise tiin meeting chuan a rel a. Lui kawr leh tui luan kawr thenfai leh chei that te, pawna inthiar awm tawhlohna Open Defecation Free town a khawpui zawng zawng puan a nih theih nan in tina ek in fai leh thianghlim neih te, vantlang ek in thianghlim taka vawn fai te, bawlhhlawh tawih thei leh theilo thliara a paihna hmun dik taka paih te, December 2017 ral hmaa in tinah bawlhhlawh bawm nei leh neilo zat chhiar te, a paihna hmun nilova bawlhhlawh paih khap te bakah faina campaign ngawrh lehzuala kalpuite chu he Cleanliness Year chhunga hmalakna tur ruahmanna siam zingah a tel a ni.
Vawiin meeting-ah hian AMC Mayor Pu PC Lalhmingthanga, GAD Secretary Pu Zothankhuma, LAD Secretary Pu Rodney L.Ralte, DP&AR Secretary Pu V.Lalremthanga, Sports Secretary Pu HL Rochungnunga, Central YMA President leh Secretary bakah sawrkar official dangte an tel a ni.
