Sawrkar laipui hnuaia Ministry Of Home Affairs chuan mi huaisen leh chawimawi tlak te chawimawina Ashoka Chakra Award hrang hrang (Ashoka Chakra Series) Republic Day 2018-a dawng thei tur hming thehluh theih a nih thu hriattirna a tichhuak.
Ashoka Chakra hi mite hriat hlawh khawpa mi huaisen, mahni nunna thapa hlauhawm laka ram veng himtute (most conspicuous bravery) hnenah pek theih a ni a, Kirti Chakra chu langsar thama pasaltha, ram leh khawtlang venhimna lama thil tite (conspicuous gallantry) hnenah hlan niin Shaurya Chakra chu pasaltha huaisen (gallantry) te hnenah pek theih a ni. Heng lawmman dawng tura thlante chu Independence Day-ah emaw Republic Day-ah ropui taka hlan thin an ni. Defence (sipai) lama thawkte chauh nilovin India khua leh tui (civilian) te, Police Forces mite, Central Armed Police mite leh Railway Protection Forces mite pawhin heng lawmman te hi an dawng thei vek a ni.
Ashoka Chakra award chi hrang hrang dawng thei nia inngai emaw, dawng tlak hriat neite chuan Mizoram Sawrkara Home Department Under Secretary hnenah ni 15 October, 2017 ral hma ngeiin Office hun chhungin dilna theh luh tur a ni a. Award dilna chhan thiltiha chu kum 2016 leh 2017 chhunga thleng a ni tur a ni.
Award dil dan kimchang hre duh tan Home Department Office-ah zawhfiah theih a ni e.
