3749/2022-2023
Saitual 3rd March 2023 : Vawiin Chapchar Kut lawmna chu Mizoram hmun dangte ang bawkin Saitual ah pawh hnam ziarang pholang thei zawngin uar taka hun hman a ni a. Keifang Centenary Sports Complex ah Kut lawmna hi neih niin Art & Culture Minister Pu R.Lalzirliana chuan Kut Pa niin hun a hmanpui a ni.
Kut pa Pu R.Lalzirliana chuan thu sawiin "Pathian khawngaihna a zarah Saitual District pawh kum 3 dawna upa a lo ni ta a. Covid 19 hrileng avanga kum 2 chhung zet Kut lawmna pawh hman theih tawh loh hnuah, Mizote Kût zinga ngaih hlut ber leh ropui ber, Chapchar Kut lawmna, Saitual District-ah hman a ni leh thei ta chu lawmawm a tih thu a sawi a. Saitual District chu district thar zingah rau rau pawh a lian ber leh mihring tamna ber a ni a, Chapchar Kut inbuatsaihna te thlirin hma an lak nasat zia a hriatin ruahmanna felfai tak nena Kut hman a ni chu ropui a tih thu a sawi.
Khuallian chuan District hmasawnna ?henkhat tarlangin State thenawm, Manipur nena inkalpawhna atan hma lak chhoh mek zel a ni a. "Sorkar department office pawh 22 lai kan lo nei ta a, kan bul tanna te ngaihtuahin, hmasawnna ropui tak a ni" a ti a. Tin, Saitual District in tunhnaia State level infiamna lama hlawhtlinna chi hrang hrang an chang chu ropui a tiin a lawmpui thu a tarlang.
Khuallian chuan Mizoram leh khawvel hmun hrang hranga Zofate, vawiin ni hi kan inlungrualna leh in-unauna tichak tu, hmalam ke kan pen zel theih nana min phuarkhawmtu lo ni ngei se" tiin Chapchar Kut hmangtute chu duhsakna chibai a buk a ni.
Kut thlengtu Pu VL Hruaizela Khiangte Saitual District Bawrhsap chuan Saitual chu khualzinte hiptu, tlang hmingthang 7, lui 6 leh Tamdil a neihte chu uar zawka pholang a, district pawimawh tak a nih theih nan hma an lak thu a tarlang bawk a ni.
Chapchar Kut hmanna ah hian Pastor T.Lalbiakliana UPC NEI chuan hunserh a hmang a, Saitual Bazar Br. YMA Zaipawl te 'Ro min rel sak ang che' tih hla an rem a, MUP Saitual Area ten hlado chhamin, Sub Hqrs MHIP ten Par lam an entir a, YMA Town Branch ten a huhovin Cheraw, Sarlamkai & Khuallam an entir a, Govt. Saitual College ten hmanlai pi leh pute hun atanga tunlai thlenga mizo inthuamna (Custume Parade) an entir a. Beat group ten hun an hman bakah chai leh chhawnghnawtin hlim taka hun hman a ni.
