3750/2022-2023

Vawiin ni 3.3.2023(Zirtawpni) hian Mizoram House, Shillong-ah Chapchar kut ropui taka hman a ni a, he hunah hian HRD Board Vice Chairman, Dr. L. Thangmawia chu Kut Pa niin Dy. Residence Commissioner Pu Lalchhanhima chu Kut thlengtu a ni a, Prof. C.Nunthara chu Resource Person niin Chapchar kut lo awm chhohdan a hnen atangin ngaihthlak a ni.

Chapchar Kut hmannaah hian Dr L. Thangmawia chuan Shillong a Chapchar kut hmangtute chu Kut chibai bukin Shillong chu Zofate tana hmun pawimawh, kan mi hmasa tam tak ten retheihna hneha an lo zirchhuahna hmun a nih avangin he huna tel tura sawm a ni chu thinlung taka a lawm thu a sawi a. “Kut hi mihringte tan a hluin a pawimawh viau a ni ang, khawvel hnam tinin kut chi hrang hrang an nei deuh vek a, kan rama chanchintha a lo thlen tirh lai khan kan pi leh pute tih thin tam tak, kut te, khuang te remchang lo a ngaihna lian tak a awm chho va. Khuang te phei chu khap hial niin hun lo kal zelah zu hmun sa hmun atan chauh ni lo, Pathian fak nan a hman a lo nih takah chuan Biak Ina lakluh leh a ni, chutiang zelin kut hrang hrang kan neih te pawh kan culture-a bet tlat an nih avangin hmanlai kan pi leh pute hman thin dan hi chanchintha kan hnena a lo thlen hnuah remchang vek lo mahse, khuang ang bawk hian kan rinna nen inrema hlim taka kalpui dan kan zawn zel a hun tawh hle a ni”, a ti a, “Zofate hi Pathianin hnam angin min dinchho mek a, Mizo Tawng pawh zofate zingah kan tawng in tawm(Common language) turin a kal chho mek niin a lang a. Hei vang hian kan Chief Minister zahawmtak Pu Zoramthanga pawhin Mizo Language Development Board(MLDB) din turin thutlukna siamin a bawhzui hna chu HRD Board kutah a dah a. March ni 10, 2022 khan MLDB Bill chu Mizoram Assembly House-ah lungrual taka pass a ni a, hnathawka thei a he Board siam turin sawrkarin chak takin hma a la mek a ni” a ti bawk.

Shillong-a Chapkar kut hmannaah hian Rev. Dr. Ramengliana, Secretary, NEICC chuan hunserh hmangin MUP Shillong Unit atangin Hlado chham a ni a, MHIP Shillong in Par lam entirin MSU Shillong-in Cheraw an kan a, YMA Madanrting Branch in Sarlamkai leh YMA Shillong South Branch-in Chheihlam an entir a, Mal zai leh Live music te nen hun hman a ni bawk a, Pu Roluahpuia, Secretary, Chapchat Kut Organising Committee-in lawmthu sawiin hun a khar a ni.