3748/2022-2023

Lunglei the 3rd March, 2023 - Vawiin khan Lunglei Thuamluaia Mual-ah ‘Zofate Inpumkhatna’, tih thupuia hmangin Chapchar Kut 2023 chu ropui taka lawm a ni a, Pi Ramdinliani, DC Lunglei chu Kut thlengtu niin MYC Chairman Dr Vanlaltanpuia chu Kut Pa a ni.

Kut Pa Dr Vanlaltanpuia chuan Chapchar Kut hmang tura kalkhawm zawng zawng te duhsakna chibai bukin Kut ropui taka hman anih theihna tura Chapchar Kut Organizing Committee-te inpuahchahna chu fakawm a tih thu a sawi a. Mizoten Kut kan neih hlu berte zinga mi, kum tina ropui taka kan lawm Chapchar Kut chuan Zofate inpumkhtana min pe a, min tel khawm hi a hlu takzet a ni tiin Chapchar Kut chu hnam inpumkhatna leh inlungrualna thlentu pawimawh tak a ni, a ti a. Chapchar Kut thupui thlan ‘Zofate Inpumkhatna’ vawng nung turin mawhphurna kan nei theuh a ni tiin kan inpumkhatna ti chhe thei zawnga thil tilo turin mipuite a chah a. Thalaite chu ruiihhlo laka fihlim tlat tura chahin an eizawnna kawng tur uluk taka tun atanga ngaihtuaha hma la tura chahin Chapchar Kut hmang tura kalkhawmte chu Kut nuam leh hlawkthlak tak hmang theuh turin duhsakna a hlan a ni.

Chapchar Kut hawnna inkhawm ah hian Major PC Lianthanga, Divisional Commander, Salvation Army chuan hunserh hmangin Pu Lalrotluanga, Co- Chairman Chapchar Kut Organizing Committee in hun a kaihruai a, Pu Zothanzuala Hnamte, Secretary, Chapchar Kut Organizing Committee atangin report ngaihthlak a ni.

Vawiin Chapchar Kut lawmna ah hian Lunglei khawpui leh a chhehvel khaw mipui thahnem tak kalkhawmin YMA Sub Hqrs Lunglei Zaipawl, MZI Zaipawl, Branch YMA hrang hrang atangte, MHIP, MCAA leh MCO lam atang ten malzai, zaipawl, rimawi tum ngaihthlaka leh hnam lam thlirho a ni a. Mizo hnamlam pholan zingah Parlam, Sarlamkai, Chheih lam leh Chai, Solakia, Chawnglaizawn, Cheraw te entir a ni.

Kum danga lo tih thin tawh angin MJA Lunglei ten Chapchar Kut Miss an thlang a. Lunglei Photographers’ Association ten Kut Hraite an thlan bakah Photo Booth leh Photograph Exhibition an buatsaih a. Lunglei Entrepreneur Forum ten stall siamin an thilsiam chhuah hrang hrangte an zuar a, mipuiten an hlut hle a ni.