472/2026-2027

Dated Aizawl, the 11th May 2026: Vawiin khan Ephatha Special School for the Deaf & Hard of Hearing chuan R.S.T.C Building, College Veng-ah an school kum 10 tlin lawmna hun an hmang a. He hun hi Art & Culture Department changtu Minister Pu C. Lalsawivunga chuan khuallian niin a hmanpui.

He hunah hian Art& Culture Minister, bialtu MLA ni bawk Pu C. Lalsawivunga chuan thu sawiin Ephatha Special School-in kum 10 an tling thei chu a lawmpui thu a sawi a. Zirlaite chu an nungchang mawi tak leh zirtirtute thu an awihna chu chhawm nung zel turin a chah a. Ephatha Society of Mizoram for the Deaf and Hard of Hearing (ESOMDHH) te inpekna leh nu leh pa te nena an tanrualna chu ropui a tih thu leh Principal leh zirtirtuten naupangte an enkawl dan chu fakawm a tih thu a sawi a. Zirlai naupangte chu fuihin vohbik an nihna chu mahni indahhniam phahnaa hmang mai lo tur leh eizawnna kawng an neih theihna tura lehkha tha taka zir zel turin a chah a, sawrkar pawhin a theihna apiangah a ngaihsak em em a ni tih hre reng turin a chah bawk a ni.

Ephatha Special School for the Deaf and Hard of Hearing hi Ephatha Society of Mizoram for the Deaf and Hard of Hearing (ESOMDHH) enkawl niin, tun dinhmunah hian zirlai 32 awmin Indian Sign Language hmangin zirtirna pek thin an ni a. Vawiin programme-a tarlan a nih danin Ephatha Special School chuan India rama a hmasa ber atan Mizoram State Commission for Protection of Child Rights nen thawk hovin POCSO Act chu Indian Sign Language hmangin video an siam a. Ephatha Special School hian Mizoram State Council for Child Welfare buatsaih National Painting Competition(State Level)-ah pawh kum 2022, 2024 leh 2025-ah te khan pakhatna dinhmun Junior leh Senior category-ah an lo hauh tawh a. Bengngawng tawngtheilo ten Pathian thu an ngaihthlak ve theihna turin Sunday Service for the Deaf chu ESOMDHH hmalaknain kum 2024 atang khan Ramhlun East Presbyterian biakinah hun hman thin a ni bawk.

Vawiina hun hman hi ESOMDHH General Secretary Pi Jenny Lalbiaktlingi chuan kaihhruaiin, ESOMDHH President Pi Saihmingthangi'n kalkhawmte lawmna thu a sawi a. Hemi zawh hian Ephatha Special School Principal Pu Samuel R.Lalhmangaiha chuan report pein Senior Advisor Pu Lalbuatsaiha hnen atangin thusawi ngaihthlak a ni a. Vohbik naupangten special item mit leh beng titlai tak tak an entir bawk a. Pi Jenny Lalbiaktlingi chuan lawmthu sawiin hun hi a khar a ni.