1224/2023-2024

July ni 21, 2023: Art & Culture Minister Pu R. Lalzirliana chuan vawiin chawhnu khan Mizo Writers Association (MWA) in Synod Conference Centre-a, Mission Venga Foundation Day & Thu Leh Hla Kutpui 2023 a buatsaih chu khuallian niin a hmanpui.

Minister Pu R. Lalzirliana chuan MWA chu ram thuziak vawnhim leh chawimawi kawnnga hma nasa tak lo la a, thuziakmite chawisan kawnga theihtawp chhuah, Mizo literature humhimtu pawl pawimawh an nih thu sawiin, an hmalaknaah theihtawp chhuah zel tura a beiseina leh duhsak thu a sawi a. Art & Culture Minister chuan thuziak hi hnam min phuarkhawmtu leh tingnungtu pawimawh tak a nih thu sawiin, hnam chanchin min zirtir bakah hnam anga kan nun kaihruaitu pawimawh tak a nih thu a sawi a. Literature chuan ramri in a dan ve loh avanga khawvel hmun hrang hranga chengte pawh a phuarkhawm theih thu a sawi. Pu R. Lalzirliana chuan tunlai khawvelah thalaite zingah pawh novel te siam a thu leh hlaah tui thar an awm thin chu a lawmawm viau laiin, literature ngaihsakna a tlahniam anga a lan thu a sawi a. Ziak leh chhiar lama tui leh ngaihtuahna puitling, rilru zau leh fing tak chu thil kalkawp leh inhmeh tak a nih thu a sawi a. Ziakmi te chu ram leh hnam a tha zawnga kaihruaitu pawimawh tak an nih zia sawiin theihtawp chhuah zel turin a chah a. Khawvelah hnam chimral a awmte chuan tawng (language) an chan hmasa ber thin tia sawi a awm thu tarlangin, hnam humhalh nan tawng humhalh a pawimawhna te, chubakah chuan hnam inpumkhatna atan te a pawimawh thu a saiw bawk.

Khuallian hian MWA buatsaih 2023 Mizo Literary Award chu Dr. L.N. Tluanga leh Prof. R.L. Thanmawia te hnenah a hlan a. B.A. Mizo Honours subject-a hmu sang ber hnena an hlan thin R. Buchhawna Proficiency Prize chu Lalremtluanga Pachuau, Faith College, Zarkawt, Aizawl atanga pass chhuak hnenah a hlan bawk.

He programme hi MWA President Pu R. Lallianzuala chuan kaihruaiin Secretary Pu H. Ngurthansanga leh Treasurer Pu T. Lalnunsiama te hnen atangin report ngaihthlak a ni a. Executive Committee Member Pu Lalhruaitluanga Ralte chuan Literary Award dawngtute kawmna neiin Adviser Prog. J.V. Hluna chuan lawmthu sawiin hun a khar a ni.

Mizo Writers Association hi July ni 23, 1977 khan din a ni a. Mizo twang lehlin Lehkhabu tha ber (Translation Book Award) thlan leh Mizo Proficiency Prize sem thin a ni a. Mizo Proficiency Prize hi kum 2008 atanga hlan tan niin prize pali a then a ni a. Chungte chu (i) Ch.Pasena Proficiency Prize - HSLC Exam-ah Mizo Subject-a a hmu sâng hnenah hlan thin a ni. Kumin hian ber Ch. Pasena Proficiency Prize dawngtu mi pahnih an awm a. Chungte chu Rose Mary Lalruatsangi, Mount Carmel School, Chaltlang leh Lalnunsangi, St. Joseph HSS, Ramhlun North te an nia. Prizes hi ni 9.6.2023 khan hlan tawh an ni. (ii) Lalmama Proficiency Prize - HSSLC Exam-ah Mizo Subject-a hmu sâng ber hnena hlan thin a ni a. Kumina Lalmama Proficiency Prize dawngtu chu Rodinpuia Ralte, Home Missions School atanga Class XII pass chhuak a ni a. Ni.9.6.2023 khan he Lawmman hi hlan tawh a ni. (iii) R. Buchhawna Proficiency Prize - B.A. Mizo Honours Subject-a a hmu sang ber hnena hlan thin a ni a, kuminah Lalremtluanga Pachuau, Faith College, Zarkawt, Aizawl atanga pass chhuak chuan a dawng a ni. (iv) J. Malsawma Proficiency Prize - M.A Mizo subject-a hmu sâng ber hnena hlan thina ni a. Kumina dawngtu tur hi University-in MA Mizo result an tihchhuah hun ngaihchan mek a ni.

Proficiency Prize dawngtute hian chawimawina thuziak leh Tangka fai Rs 5,000/- an dawng a, an lawmman hi Proficiency Prize hming putute chhungkuain an tum thin a ni.