3031/2024-2025

Dated Aizawl, the 15th November, 2024: Vawiin chawhma dar 11:00 khan Art & Culture Minister Pu C. Lalsawivunga chuan Mizo Zaimi Insuihkhawm Pawl (MZI) Inkhawmpui ni hnihna, Tourism Multipurpose Hall, Berawtlanga neih chu Khuallian niin a hmanpui a, MZI Website a tlangzarh nghal bawk a ni.

Khuallian Art & Culture Minister Pu C. Lalsawivunga chuan MZI-in kum 44 hmel a hmu thei chu pawl zahawm leh ropui tak a nih zia tarlangtu ni a a hriat thu sawiin, an pawl inzarpharh dante chu entawn tlak hlea a hriat thu a sawi a. MZI chu zaimite insuihkhawm pawl a nih mai piah lamah, thangthar zai lama tuite  tana hun leh hmun siamsak tura ke pen thin, hla phuahtute, zaipawl leh band chi hrang hrangte chena lenna huapzo pawl a ni chu ropui a tih thu a sawi a. Zaimite chu Mizo hnam nunphunga bet tlat zai ngainatna chawilar leh, khawvel hriata pho chhuah tlaka tihhmasawn kawnga ke penho puiah sawmin, thu leh hla chuan sakhuana thlengin mi rilru a khawih theih avangin khawvel mit hmuhah zai mite chuan Mizo hnam chu an pho chhuah theih a rin thu a tarlang a. Eng kawng pawh zawh ila, eizawnna tlak a thiamna nei tur chuan taimakna leh tumruhna neih chu a pawimawh tih sawiin, zaimite chu mahni inzir zel tura a fuih bakah, zuk leh hmuam, ruihhlo leh mipat hmeichhiat hman khawlohna lakahte fihlim zel turin a chah nghal bawk a ni.

Vawiina hun hman hi Er. Lalrothanga, President, MZI chuan kaihruaiin kalkhawmte lawmna thu a sawi a, an pawl mamawhte a tarlang nghal bawk a. Pi C. Lalrosangi, Assistant General Secretary, MZI chuan kum 2022 leh 2024 inkara MZI hmalakna chi hrang hrangte report pein, Pu K. Lalchamliana, FInance Secretary chuan 2022 leh 2024 inkara MZI sum chin report a pe nghal bawk a. MZI General Headquarters zaipawl zai  leh malzai bengfah tak tak ngaihthlak a ni a; zai hona neiin chawhma lam hun hman hi khar a ni.