3032/2024-2025

Dated Aizawl, the 15th November 2024: Mizoram sawrkar Corporate Social Responsibility Cell, Pu TBC Lalvenchhunga, Adviser to Chief Minister (Finance & Planning) leh Pu Lalmalsawma Pachuau, Secretary, Planning & Programme Implementation kaihhruai te chuan, tunkar hian Mizoramin hmasawnna hnathawhna tur CSR Fund tam zawk a hmuh theihna tur dapin Bangalore-ah hun an hmang a. UNDP nena tangkawpin CSR pe chhuak thin mimal leh pawlte nena inkawmna hun an buatsaih.

A ni hmasa berah CSR Cell te hian IIM Bangalore-a NSRCEL leh NASSCOM startup hub hotute nena inkawmna an nei a. Mizoramin sustainable development goals tihlawhtling tura a ruahmanna leh chumi atana CSR pe thei pawlte thawhpuina an mamawh dan an sawipui. Heng pawl lian pahnihte hian Mizorama startup sector lo thang lian chho meka hma lak ve an chak thu leh state hmasawn zelna atana kawng thar tam tak (innovative solutions) dap theih an inring a ni.

A ni hnihnaah hian UNDP te nena tangkawpin CSR fund pe chhuak thin private sector, corporate foundation, philantrophic group leh CSO aiawh mi 40 vel nena inkawmna (stakeholder consultation) an nei leh a. Zirna, skill development, employment, entrepreneurship, women’s empowerment, health, sports leh climate change lamah te sum tlem zawk seng a; tunlai thiamna hmanga awmze nei zawka hmalak theih dan an sawiho.

CSR fund pe chhuak thin pawlte hian Mizoram CSR Cell hmalakna hi an ngaihluin, Mizoram sawrkarin Sustainable Development Goals tihlawhtling tura a ruahmanna te an phurpui hle a ni.

Team leader leh Chairman CSR Cell, Pu TBC Lalvenchhunga chuan, Mizoram chu hun rei tak India ram state zinga CSR dawng tlem ber a ni tawh a. CSR hmang hian hmasawnna hna tha tak tak thawh theih a nih avangin, Chief Minister Pu Lalduhoma chuan private sector leh civil society organisation te nena thawhhona tam zawk neih tumin CSR Cell hi a din a ni. A theih ang angin hma kan la nghal a, tunkar hian UNDP te nena tangkawpin Bangalore ah stakeholder te nena inkawmna hun hi kan nei ta a ni, a ti. Kan hmalakna hian rah tha tak a chhuah ngei dawnin kan hria, a ti bawk.

Pu Lalmalsawma Pachuau, Secretary, Planning pawhin, sawrkar atangin hmasawnna hnathawhna tur fund a tam tawk lo fo a, CSR pe chhuak thin private sector leh pawl dangte nena thawhhona neih theih hi a hlu em em a. Tangkai takin hmasawnna atan a hman theih a ni, a ti.

Pu Jeya Chandran, Regional Head, South India, UNDP  chuan "State sawrkarin a ruahmanna tihlawhtling tura hetiang zawnga hma a lak kan hriat vawi khatna a ni a, Mizoram CSR Cell hian danglamna (change) thlen kawngah midangte tan pawha entawntlak thil a ti a ni" tiin CSR Cell te hmalakna hi a fak a ni.

Mizoram CSR Cell te hian tluang takin vawiin hian Aizawl an lo thleng.