3033/2024-2025

Dated Kolasib the 15th November 2024 : Vawiin khan India ram chhunga Tribal mipuite hmasawnna huang 'Dharti Aaba Janjatiya Gram Utkarsh Abhiyan' chu India Prime Minister Narendra Modi chuan Video Conference hmangin a puangzar a. He hunah hian Department of Social Welfare and Tribal Affairs, Ministry of Tribal Affairs hnuaia ‘Eklavya Model Residential School’ (EMRS) Bilkhawthlir a din chu Prime Minister hian a hawnna hun Video Conference hmanga nei nghal in Kolasib DC Office Hall-ah Pu Lalfamkima, Deputy Speaker, Mizoram Legislature Assembly hovin Kolasib DC, Pu Robert.C Lalhmangaiha leh Kolasib District a Sawrkar Officials dangte leh Bilkhawthlir EMRS a Principal leh a thawhpuiten Prime Minister Video Conference hi an chhim a ni.

Deputy Speaker Pu Lalfamkima chuan Eklavya Model Residential School (EMRS)  chu Mizoramah hmun dangah pawh lo awm  tawh mahse Kolasib District chhungah ngei Central School tha leh rintlak an nei thei ta chu a lawmawm a tih thu sawiin  mipuite pawhin an hman tangkai ngei a beisei a ni, a ti a. School tha an nei thei chu an vanneih zia hria a, hetiang anga hmasawnna vawiin a Prime Minister meuh in min hawnsak chu a lawmawm tak meuh meuh a ni a ti . Hei bakah hian vawiin ni a Central Scheme India ram chhunga District hrang hrangte tana Prime Minister-in a a hawn 'Dharti Aaba Janjatiya Gram Utkarsh Abhiyan' chungchang sawi zauna hun hmangin, hnam hnufual zawkte kawng hrang hranga hmasawnna an neih theihna tur a nih thu a sawi a. He Scheme hi hmang tangkai ve ngei thei tura an lo inbuatsaih a pawimawh thu Deputy Speaker chuan a sawi bawk.

National Education Society for Tribal Students (NESTS), Ministry of Tribal Affairs in India ram chhunga Scheduled Tribe zirlaite’n zirna chhenfakawm tak an neih theihna tura a hmalakna pakhat, Eklavya Model Residential School (EMRS) hi Mizoram-ah Social Welfare & Tribal Affairs enkawlna hnuaiah kalpui niin, Mizoram EMRS Society in a enkawl a ni a. India danpui Article 275(1) behchhan in Eklavya Model Residential School hi Tribal mipuite chawnkanna atan duan niin, kum 2018 - 2019 Central Budget ruahmanna angin State leh UT chhunga Development Block tina mipui 50% Tribal Category awm tlinna hmunah emaw Tribal mipui 20,000 awm tlinna Block-ah te EMRS hi din tur a tih a ni.

Eklavya Model Residential School Bilkhawthlir ah hian Academic Session 2024 - 2025 atangin zirna kalpui tan a ni a, tun Session atan chuan Class - VI leh Class - VII chauh hawn rih a ni a, Class - XII thleng a hawnbelh tura ruahman a ni. Tunah hian zirlai hmeichhia - 54, mipa - 43 an vaiin zirlai - 97 an awm mek a. Thawktu hi Teaching Staff leh Non-Teaching Staff te nen an vaiin 16 an awm mek a  ni.