Vawiin chawhnu khan Art & Culture Minister Pu R.Romawia'n ni 6 chhung awh tur National level Painters' Camp chu Banquet hall, Tourist Lodge ah a hawng. Painters' Camp hi Lalit Kala Akademi Regional Centre, Lucknow leh Mizoram Artists' Society(MAS) te tangkawp buatsaih a ni a, March 9 ah khar a ni ang.

Art & Culture Minister chuan lemziak chu hlimna thlentu,awmze thuk tak nei leh rilrua suangtuahna tam tak  te pawh tarlanna a nih bak ah hmasang atang daih tawh a history inhlan chhawnna thleng atan te pawh a hman tangkai  a nih thu a sawi a.

Mizoram ah pawh kan lemziak thiam ten zirna pawh awm mumal lovin an theih ang angin an inzir chhuak a, kuthnu ropui tak tak te leh lemziak tha tak tak te pawh tam tak an sual chhuak tawh a ni a ti a. Lemziaktu te hian an hun pum  deuh thaw hna an thawk a, an tuina hmanga ei an hmuh ve nan an kutchhuakte kan hlut sak a ngai a ni a ti a. He camp hi Mizoram Artist te tan Art college chhuak, lemziaka eizawng tu te leh zirtirtu te  hma ah Mizo te thiamna leh theihna a hniam bik loh zia tar lang tur in chona a pe a. An hnen atanga thiamna chidang te leh  Mizo artist te la belhchian loh lemziak dan chi dang te thiam nan hmang tangkai turin a chah hlawm a  ni. State pawn lam atanga lemziakthiam rawn kal te pawh Mizoram leh a chhunga chengte hlimthla chu lemziak tluangtlam mai bak ah abstract painting, expressionist painting leh a chi dangte a pholang turin a ngen a ni.

Thusawitu dang, Pu Sidartha Gosh, Secretary, Lalit kala Akademi Regional Centre, Lucknow ami chuan Mizoram a Lemziak thiamte, mahni a thiamna leh eizawnna sual chhuak tu te chu an fakawm hle a ni a ti a. Mizoram hian ART College te han nei phei se chuan talent neitha em em thalai tam tak te hian an hlawkpui hle in a rinawm a ni a ti a.  Lalit Kala Akademi Regional Centre chuan kumtluan in Artist te tihhmasawn programme hmun hrang hrangah a lo kalpui tawh thin a, Mizo  Lemziak tute pawh a remchan dana zirtirna leh kawng kawhhmuhna hun siam sak zel an ni ang a ti.

National Level Painters' Camp innaugural programme hi Art & Culture Jt Director Pu R.Hmingthanmawia leh Mizoram Artists' Society(MAS) President Pu Rosiamliana Ralte ten an kaihruai a. He camp ah hian India ram hmun hrang hranga Art Professor te, Art chungchanga documentary siam thin te, Artist te leh Mizo Artist te chuan an thiamna te an inzirtawn dawn a. An kutchhuak lemziah te hi  Lalit kala Akademi Regional Centre, Lucknow ah enfiah tura thawnthlak a ni ang. Mizoram rawn tlawhtu lemziakthiamte chuan Mizoram a painting camp an neih chhunga an rilru a an lo suangtuah  lawk zinga lian deuh ber chu Mizo nun hlui, thingtlang nun leh culture lam thil te a nih thu an sawi a ni.