Ni li chhung awh tur Mizorama Food Fest hmasaber chu vawiin khan Sipai Lammual Basketball Court-ah Pu Joseph Lalhimpuia, Parliamentary Secretary in a hawng.

Pu Joseph Lalhimpuia chuan  “Mizote hian taksa tana tha aiin hrawka tui hi kan ngai pawimawh zawk fo a, tunlai khawvel thang zelah miin taksa hriselna atana tha chu tui ti lem lo mahse ei hram hram kan tum ta hlawm mek a. Heng eitur te hi hunbi neia thar chhuah te an nih hlawm avangin thar hun lem lovah te pawh eitur thianghlim a awm theihna atan vawn that a, hralh chhuah leh hi mi tam tak tan eizawnna tling a lo ni ta a, chu chuan kuthnathawka eizawngte tan malsawmna tamtak rawn thlenin; ram economy pawh nasa takin a rawn thantir ta hial a ni,” a ti a. India ram hi mi chi hrang hrang chen tam na, eitur tui leh dangdai tak tak tamna ram anih avangin Food Processing Industry ah hian hmasawnna tur kawng a tam hle a ni tiin, Industry chi dang anga thil lian tham taka tih ngai lovin mi tlem te, mimal leh chhungkua lek pawha tih theih a tam em em a ni, a ti. Pu Joseph Lalhimpuia chuan, “Ei leh bar intodelhna kawnga hmalakna pawimawh tak, Mizoram pawhin thui taka hmakansawn theihna tur kawng a inhawng mek a, hmabak erawhkanla ngah hle a ni,” a ti. Ei leh in thianghlim zawka sawngbawl kawngah tan kan lak angai hle a ni tiin, hemi kawnga infuih tharna leh inzirtirna atana Food Fest buatsaih chu lawmawm a tih thu a sawi bawk a ni.

Sorkar laipui chuan eitur thianghlim taka sawngbawl anih theih nan Ministry of Food Processing Industry dinin, tunah hian National Mission on Food Processing (NMFP) chu mumal takin a kal chhoh pui mek a. Mizoram ah pawh he hmalakna tipuitling tur hian Dt. 28.11.2011 khan Mizoram Food Processing Development Society  chu din a ni a.  India ram pumah he Project atan hian cheng vaibelchhe 1240.74 dah a ni a, Mizoram pawhin cheng vaibelchhe 11.31 chang in, hei hi 2013 -2017 chhunga hman tura tih a ni a. Tunah hian cheng Vaibelchhe 2.9325 dawn a ni tawh a ni.

NMFP ruahmanna hnuaiah hian Central-a Ministry hrang hrang - Food Processing Industry, Small and Micro Enterprises, Rural Development te chuan chak takin hma an la mek a. Sorkar mai nilovin Central Food Technological Research, Central Institute of Post Harvesting Engineering and Technology, Indian Institute of Crop Processing Technology, NABARD, ICAR, Coffee Board, Tea Board, Spices Board te tangrualin eitur tha leh hrisel siam a, vawn that a, hralh chhuah dan tur ruahmanna neiin Food Fest hi hmun hrang hrangah an nei thin a, Mizoramah chuan tun hi a vawikhatna tur  a ni. Mizoram GSDP (2011-12) ah chuan Agro. Food Processing atangin 761.00 Lakhs hmuh chhuah a ni a, chu chu State GSDP pumpui atangin 0.15% a ni.

Food Fest hawnna inkhawm hi Pu Sangdingliana Addl. Secy. Industry Dept in a kaihruai a, Pi R. Lalrodingi, Joint Director, Industries Dept. chuan Food fest buatsaih anih dan te report a pe a ni.

Food Fest-ah hian Food Servicing (catering) ti thin 9 an tel a, Food Processing industry 20 bakah Mifco pawh an tel a ni.