Vawiin chawhma dar 10:30 khan Lunglei Art & Culture Auditorium ah Zohnahthlak Inpumkhatna Seminar Lunglei Academy of letters, Lawngtlai Academy of letters leh Chhimtuipui Academy of letters te tangkawp buatsaih chu Pu P.C Zoram Sangliana, Art & Culture Minister in a hmanpui.

Pu P.C.  Zoram Sangliana chuan hmakhawsang tun a thangthar te chhui phak lovah kan pi pu ten zohnahthlak hnam peng zawng zawng khaikhawm nan Mizo tih hming hi lungsi takin an lo phuah tawh a, he Mizo hnamzia leh nihna hre lovin 1890 khan British ho chuan Mizo te chu ram bung thum - India, Bangladesh leh Myanmar ah min lo then hrang ta a, heta tang hian in ngeih lohna leh hnam bil chawi kan tum avanga inchem harna lo awm in inngeih lohna avangin thisen tam tak a lo luang ta a ni a ti.Tuna Mizoram kan tih hi Mizote chenna ram hmun 5 a then a hmun 1 pawh a tia lo a ni a ti. Mizo nihna ah kan chian a chi bil lak vawng na leh kan inngeih lohna te kan khenbeh chuan Mizo hnam ropui tak thin kha a tho leh thei dawn a ni a ti. British in bung 3 ah min chhuah a, harsatna tam tak min thlen mahse thil pahnih hlu tak min pe ve a, chu chu Chanchintha leh Ziak leh Chhiar thiamna a nih thu a sawi. Minister chuan Zo hnahthlak te inpumkhat leh na atana thil pawimawh ber leh rintlak ber chu Chanchintha hi zohnahthlak te an dam leh nan leh an dinchhuah leh nan a Pathian in min pek a nih a rin tlat thu a sawi a ni.

Inkhawm hi Pu C.Hrangdula, President, MAL in kaihruaiin, zirchianna thu ziak “Zo hnahthlak inpumkhatna-Pipute infiamna atangin” tih Pu K.Hrekunga, President, LAL leh “Zo hnahthlak inpumkhatna - Pipute thawnthu atangin” tih Dr. Chawngkhuma Chawngthu, President, CAL ziak atang te in hnam inpumkhatna atana tangkai thu ngaihnawm tak tak ngaihthlak a ni. MAL, Lunglei chuan Pu P.C. Zoram Sangliana hi Zochawi Diar an hlan a, he mi rual hian “Chham hla” (Nun farchhuak) Pu C.Lalhruaitluanga, Executive member, MAL, Lunglei ziak chu a tlangzarh nghal a ni.