1957/2024-2025

Aizawl, 7th September : Consulate General of India, Istanbul, Turkey leh North East Institute of Fashion Technology (NeIFT), Guwahati ten Istanbul, Turkey a ‘North East India Festival -2024’ an buatsaihah telpui tura an sawm angin, Pu C.Lalsawivunga, Hon’ble Minister, Art & Culture Department chuan September ni 6, 2024 khan he Festival hi a hmanpui.

He hunah hian Arunachal Pradesh Textile & Handicrafts Minister te, NE state hrang hrang atangin Department Secretary leh Director te an kal a. Istanbul Mayor leh Municipal ity hotu lu te, Istanbula ram 37 aiawh te an kal khawm a, ram hrang hrang Consul General te an kim hle a ni.

He huna a thusawi naah Mizoram Art & Culture Minister Pu C.Lalsawivunga chuan, North East India State te hi kan awmna hmun in a zir loh avangin India ram lairil a State dang te nen kan in laichinna a tha tawk lo hle a. Kan Indian pui te ngei pawhin min mikhual en mai bakah ramdang mite phei chuan India mi kan ni tih hi rin harsa an ti hle a, hetiang ang hun tha leh remchang India Consulate, Turkey leh North East Institute of Fashion Technology ten North East State te an buatsaih sak hi  lawmawm a tih thu a sawi a. He Festival ah hian North East State pariat te atangin hnam lam, hnam zai, malzai te entira ni a, Mizoram aṭang pawhin Cheraw lam entir a ni a, mipuiin an hlut hle. Tin, North East state tina designer ten an thawmhnaw design te pho chhuahna hun an nei bawk. He programme hian India leh a bik takin Northeast-a hnam hrangte culture hausa tak leh ziarang danglam tak te leh thing leh mau, tlâng mawi tak kan neih te chu ramdang mite mit hmuha pho chhuah a, khawvel hriata tarlan chu a tum pakhat a ni.

Minister hi Art & Culture Department Director, Pi Carol VLMS Dawngkimi leh Cultural Troupe ten an tawiawm bawk a ni.