1958/2024-2025

Aizawl, the 7th September, 2024: Tuipuiral Zirlai Pawl (TZP) Gen. Hqrs., Aizawl buatsaih Tuipuiral Zirlai Pawl Freshers' Social, 'Hun Vawn Dik' tih thupui hmanga vawiin chawhma dar 11:00 a Chandmari YMA Hall-a buatsaih chu Sports & Youth Services Minister Pu Lalnghinglova Hmar chuan khuallian niin a hmanpui a, East Tuipui bialtu MLA Pu Ramthanmawia chu khualzahawm a ni.

Khuallian Pu Lalnghinglova Hmar chuan Tuipuiral Zirlai Pawl-ten zirlai tharte lawmna pual thupui atan 'Hun Vawn Dik' tih an hmang chu tha a tih thu sawiin, mihlawhtlingte'n hun an hman dik thin avangin zirlaite chu zingkar hman tangkai tum tur leh, hun vawng dik mi nih tum turin a chah a. Zirlaite chu an chawrchhuahna zahpui lova a tihmingthatu nih tum turte, mahni khawchhuahna ngaipawimawh turte leh nu leh pate thu awiha chawimawi thin turtein a chah a. Zirna kawngah inelna a nasat tawh thu leh midangte nen hna zawn kawngah an la inel a tul dawn avangin zirlaite chu hlawhtlinna chang thei tura tun atanga inpuahchah lawk turin a fuih a. Zirna tih loh thil danga inhnamhnawih tam lo tur leh rilru pawt peng thei laka inthiar fihlim thiam turin a chah bawk.

LESDE Minister ni bawk chuan Sawrkar hnain mi zawng zawng a daih vek dawn loh thu sawiin, eizawnna ngelnghet pe thei dangte ngaihven tel turin a chah a. Zirlaite chu tunhma hun kal tawha thil pawimawh tak takte, kan awmna leh a chhehvel hmunhma awmdan bakah ram inrelbawlna kalhmang, inlumleh dan leh sukthlekte tha taka zir turin a fuih a. Sports Minister chuan India-in Olympic 2036 thlen a tum thu sawiin, hemi atan hian Mizote'n enge kan tih ve theih tih kan ngaihtuah chho mek a, Mizoram hmun hrang hranga thiamna leh theihna awmte awmze nei lehzuala zawn chhuah tum a ni, a ti a. Zirlai kalkhawmte chu ruihhlo leh a kaihhnawih laka fihlim tum tur leh a do kawngah pawh thahnemngai taka Sawrkar thawhpui turin Excise & Narcotics Minister ni bawk chuan a sawm a ni.

Khualzahawm Pu Ramthanmawia chuan a bial East Tuipui huamchhunga zirlai, Aizawl lama awm tharte thinlung taka a lo lawm thu a sawi a. Tuipuiral tlangdung chu infiamna leh zirna lama theihna nasa tak nei a nih thu sawiin, zirlai kalkhawmte chu hemi chhawmnung thei tura theihtawp chhuah turin a fuih a. Vawiin thlengin East Tuipui huamchhunga zirlai 39 te hnenah MLA Award Laptop hlan a nih tawh thu sawiin, "Hei hian zirna a pawimawh zia tarlang thar leh se, zirnaah nu leh pate'n thahnem ngai zualin tanlakna thar min pe se ka duh a ni," a ti a. Tuipuiral tlangdunga zirna tihhmasawn kawnga hmalak dante tarlangin, zirna sang zawk belh tum, harsatna tawkte pui turin a inhuam reng thu a sawi a ni.

He hun hi Pu Benjamin Rochhunga, Vice President chuan kaihruaiin Pu C. Lalramchhana, Gen. Secretary-in report pein inhmelhriattirna hun a hmang a. Pu K. Lalnunzama, Adviser-in freshers pual thuchah a sawi hnuah TZP thil tum leh din chhan sawirual a ni a. TZP President Pu Lalnunsanga, TZP Adviser & Life Time Member Pu J. Lalmuanzuala leh Pu Lalthawhsaka Fanai, President, Tuichangral Zirlai Pawl (TCZP) te hnen atangin thusawi ngaihthlak a ni bawk.

He hunah hian Utkrisht Seva Padak Award dawngtu, President lo ni tawh thin Pu PC Zirthanga Pachuau, Sub-Inpector, CID chawimawina hun hman niin, Zirtirtu pension, President lo ni tawh thin Pu Lalhluna; Dr. K. Lalmuanawmi, BHMS leh Dr. Nianglunkimi, MBBS te lawmpuina hlan an ni a. Rank holder 6, Zodinpuii, MA (Education) 1st Position; Lalramhluni, D.El.Ed 2nd Position; Joseplh V.L Rochhara, BA (Phil) 3rd Rank; C. Lawmsangzuali, B.Sc (Botany) 5th Rank, Z.T Lalduatpuii, B.Sc (Maths) 7th Rank, Ramdinpuii, B.Sc (Geo) 9th Rank leh Zosangzuali, B.Sc (Botany) 10th Rank-te lawmpuina hlan an ni.

MLA Award dawngtu HSLC leh HSSLC Exam-a Distinction-a pass zirlai 6; Malsawmdawngkimi (HSLC), R. Lalruatfeli (HSLC), Mesak Vanlalzawma (HSSLC), Lalduhawmi (HSSLC), Khen Sian Muang (HSSLC), Vanlalliana (HSSLC) leh MA Gold Medalist Zodinpuii te hnenah bialtu MLA Pu Ramthanmawia'n Laptop a hlan bawk.

Tuipuiral Zirlai Pawl hi kum 1986 ah din niin, Fresher's Social tum 16 an hmang tawh a ni.