2266/2026-2027

Dated Champhai, the 18th September, 2026 : Vawiin khan Art & Culture Department leh Bungzung Branch YMA tangkawp buatsaihin Govt. Bungzung High School tual zawlah Cutural Meet hman a ni a, he hun hi Art & Culture Department Minister Pu C.Lalsawivunga chuan khuallian niin a hmanpui.

Khuallian Pu C. Lalsawivunga chuan thu sawiin, Cultural meet hian culture hi a pawimawh a ni tih kan thinlungah tuh thar se, culture kan bosan chuan kan hnam leh kan nihna kan hloh a ni, a ti a. Kan culture kan zahpui emaw, tinung zel turin hma kan la lo emaw a nih chuan Mizo hnam kan nihna hi a ral tep tawh tihna a ni tih a sawi a. Kan culture kan ngaihhlut a, a tihhmasawnna kawngah pawh kan zavaia tan kan lak leh ngaihtuahna kan sen a tul thu a sawi.

Minister chuan Bungzung khua-a pipu hmunhlui leh sulhnu pawimawh tak mai, Sikpui Lung humhalh leh cheibawl that nan Cheng 1.2 lakh ruahman a nih thu leh a beitham deuh avangin sawrkar chuan a pek belh leh dawn tih a sawi a. Culture hian lam leh zai chauh ni loin kan nitin nunphung thlengin a keng tel, a ti a. Mizo kan nihna, kan hnam nun ze mawi vawn nun zel a ngaih thu sawiin, he Cultural Meet hi kan hnam ziarang tihmasawnna hmanrua ni thei se a duh thu a sawi.

Pu C. Lalsawivunga chuan thu sawi chhunzawmin, Cultural Meet hian kan thinlungah tlawmngaihna hlutna tuh thar leh se, aia upa zahna, kan hnam ziarang pawimawh leh mawi tak, kan nunphunga dal ta tial tial pawh inzirtir tharna atan he Meet hi hmang tangkai ila a duhawm hle ang, a ti a. Kan khawsak phung leh kan nundan te a lo danglam a nih pawhin Zonun ze mawi nunpui a, dinthar zel tur te, rinawmna leh taimakna lama tan la thar zel turin kalkhawmte a sawm a ni.

Pu F. Lalthanmawia, Joint Director, Art & Culture Department pawhin thu sawiin, Art & Culture Department chuan Mizoram khaw hrang hrang 8-ah Cultural Meet an buatsaih dawn thu leh Bungzung khua chu an bul tanna a nih thu a sawi a. Mizote min phuarkhawmtu ber chu hnam lam leh zai a nih thu sawiin uar zual sauh sauh a pawimawh a, a zir duh tan Art & Culture Department, Aizawl-ah zir theih reng a nih thu a sawi bawk.

Bungzung Cultural Meet hi Pu Laltlansanga, President, Bungzung Branch YMA chuan a kaihruai a. Tuipuiral Group chhunga Branch YMA Cultural Troupe 11-ten Mizo hnam lam hrang hrang an entir a, mimal zaithiam engemaw zatin kalklhawmte zaiin an awi a ni.