2421/2025-2026

Lunglei, 2025 Sahmulphah thla ni 27: Mizorama Indian National Trust for Art and Cultural Heritage (INTACH) chapter pahnihna, Lunglei Chapter chu Mizoram sawrkara Art & Culture Minister Pu C. Lalsawivunga chuan vawiin khan Lunglei Convention Centre-ah a hawng.

Art & Culture Minister Pu C. Lalsawivunga chuan pi leh pute sulhnu leh chin dan ṭhate chawi nung leh vawng him zel tura INTACH Lunglei Chapter hawn theih a ni ta chu lawmawm a tih thu sawiin, chumi atana tha leh zung thawhtu mi ṭhahnem ngai tak tak an awm chu ropui a tih thu leh a ngaih hlut thu a sawi a. Kum 1987-a din INTACH Mizoram Chapter zarah dan ṭha tak The Mizoram Ancient Monuments and Archaeological Sites & Remains Act 2001 neih phah a nih thu leh he dan tlawh chhan hian pi pu hmun hlui 81 lai chu State Protected Monument-ah puan a nih tawh thu te tar langin, Lunglei District lamah pawh Zosapte leh Sapho sulhnu te, pi pute sulhnu hlu tak takte chu humhalh zinga a tel thu a sawi a. INTACH hma laknain Mizoram State Protected Monument pathum – Kawtchhuah Ropui (Vangchhia), Ralven Puk (Vangchhia) leh Lungphun Ropui (Lianpui) te chu National Importance-ah puan a nih tawh thu leh Sawrkar laipui Ministry of Culture hnuaia Archaeological Survey of India aṭangin a chei ṭhat nan ṭanpuina ṭhahnem tak dawn a nih tawh thu te sawiin, INTACH chu ram rohlu leh pawimawhte humhalhtu ber a nih avangin Mizoram sawrkar pawhin a ngaih hlut a, a dah pawimawh thu te, Aizawl Pisapui kangah pawh INTACH duh ang chiaha sak ṭhat hna thawh mek a nih thu te a sawi.

Art & Culture Minister Pu C. Lalsawivunga chuan Mizoram sawrkarin Mizo hnam ṭobul leh thlang tlak dan uluk zawka zir leh chhui chiang turin Chief Minister Pu Lalduhoma kaihhruaina hnuaiah ‘Hnam Ṭobul Zawn Chhuah’ Committee a din thu leh nasa taka hma lak tum a nih thu sawiin, INTACH Lunglei Chapter chu phungbawmah sawmin, sawrkar hma laknaa ṭawiawm zel turin a ngen a. Lunglei District leh a piah chhim lam Mizoram chhunga Zo hnahthlak pi pute hmun pawimawh tak tak chu Lunglei Chapter chuan theih tawp chhuaha zawng chhuakin, Zoram mipui hriata pho chhuak turin hma la se a duh thu sawiin, Zoram chhim lama tlang hrang hrang lal leh hnamte uluk zawka zir chiang a, tu leh fate tan ziaka dah ṭhat a nih theih nan hma la turin INTACH Lunglei Chapter chu a ngen nghal bawk.

Rinawmna, tlawmngaihna, aia upa zahna, huaisenna leh taimakna te chu Mizote'n pi leh pu aṭanga kan inrochun a nih thu sawiin, Pu C. Lalsawivunga chuan Mizo nun dan ze mawi te vawn him leh a ṭha leh thang mawi apiang chawi lar a, tu leh fate hnena nun ze dik zirtir chhawn zel chu Mizo ram leh hnam din chhuah nan a pawimawh thu leh ṭhangtharte mawhphurhna a nih thu a sawi a. Art & Culture Department leh INTACH te'n pi pu hmun hlui, zo nun ze mawi leh dan ṭha, zai leh lam te vawn him leh chawi larna kawnga hma an lakna chu ṭhahnem ngai taka chhunzawm zel a ṭul thu sawiin, INTACH Lunglei Chapter chu Mizo hnam ropui leh hmasawn zel nan a hawng nghal.

He hunah hian INTACH Lunglei Chapter Convener Rev. Dr F. Sangvela'n inlawmna thu sawiin, Lunglei Chapter dinna tura hma lak a nih dan a tar lang a. INTACH Mizoram Chapter ai awhin Member Secretary Pu Lalramthanga'n thu sawiin, Lunglei Chapter hruaitute leh member-te lawmpuina a hlan a. Khuanu siam thil hlu, pi pu sulhnu leh kut chhuak thil hlui vawn him kawngah leh mi dang zirtir kawnga INTACH hma lak dan hrang hrang tar langin, pawl 7–9 zirlaite tan kum tin quiz, painting leh poster essay competition buatsaih ṭhin a nih thu te, training leh workshop buatsaih ṭhin a nih thu te a sawi.

INTACH Lunglei Chapter Secretary Pu JC Vanlal Hmuaka chuan report pein, February 2024-a Mizoram Chapter hruaitute'n Lunglei an tlawh laiin Lunglei DC hovin Lungleia INTACH din dan tur sawi hova hma lak ṭan a nih thu a sawi a. Lunglei Chapter huam chhung Mizoram chhim lama hma lakna tur hmachhawp hrang hrangte a tar lang bawk.

INTACH Lunglei Chapter hawnnaah hian Lunglei West bialtu MLA Pu T. Lalhlimpuia bakah, INTACH Mizoram Chapter hruaitute, Lunglei Chapter hruaitu leh member-te, sawrkar official-te, Government Leitlangpui High School leh Government Electric Veng High School zirlaite an tel a. Pi C. Luri'n kal khawmte zaia awiin, Mizo Cultural Artistes' Association (MCAA) Sub-Headquarters Lunglei te'n solakia lam an entir a. INTACH Lunglei Chapter Executive Committee Member Pu C. Lalhmingmuana'n lawm thu sawiin hun a khar.

INTACH hi kum 1984 khan din niin, Delhi-ah hmunpui an neih bakah, India ram hmun hrang hrangah chapter 200 chuang an awm mek a. Tuna Chapter hawn thar Lunglei Chapter-ah hian member 40 awm mekin, he'ng hi hruaitute an ni:

Convener: Rev. Dr F. Sangvela

Co-Convener: Pu K. Lalsanga

Secretary: Pu JC Vanlal Hmuaka

Treasurer: Pu ZH Ropuia