Vawiin chawhnu dar 1.00 khan Chapchar Kut 2013 hman dan tur relin Organising Committee chu an Chairman, Art & Culture Minister Pu P.C. Zoramsangliana pisaah an thukhawm.

Pu P.C. Zoramsangliana chuan, “Kut ropui leh hlimawm tak Mizoten kan nei a; he Chapchar Kut hi pi leh pute huna an hman ang khan hman a remchang tawh lo a nih pawhin, kan hnam ziarang humhalhna atan huapzo tak leh uar taka kan hman thin a pawimawh a. Lal Isua telna tlak Kut hlimawm kan hman theihna turin a buatsaihtute leh Mizo mipuiten theihtawp kan chhuah tlan a ngai a ni” a ti. Mizo hnam incheina chawisan leh chhungkaw tin hetiang thawhmhnaw lama intodelh thar leh tura tanlak a pawimawh thu sawiin, “Kan hnam incheina, mipa leh hmeichhiaten kan inbel thinte chu mi tam zawkin kan nei ta lova; puipun ni-khua apianga Art & Culture Department ta leh mi dangte ta hawhchawp lova kan intodelh thar leh a tul a ni” Pu P.C. Zoramsangliana chuan a ti bawk.

Chapchar Kut 2013 chu ni 4 chhung hman ni se tiin meeting chuan a rel a; 27th February, 2013 atanga tannin 2nd March, 2013-ah Bamboo Day hman pahin khar a ni ang. Hemi hun chhung hian Mizo hnam lam leh zaite bakah, Mizo infiamna chi hrang hrang te, exhibition-te leh mipui tel ve theihna tur item chi hrang hrang buatsaih a ni dawn a ni.Chapchar Kut 2013-ah hian Khuallian atan Union Minister for Tribal Affairs Pi Rani Narah chu sawm a ni ang a; khawvel ram hrang hrang Embassy-a ram palaite pawh sawm ni se tiin meeting chuan a rel bawk. Programme kimchang zawk chu Programme Committee duan tura dah a ni. Vawiina meeting-ah hian Chapchar Kut 2013 buatsaihna tura a kaihhnawih sawrkar Department leh tlawmngai pawl aiawhte an kal kim hle a ni.