‘Sawrkarin Sports lama Mizo thalaite tih hmasawn nana theihtawp a chhuahna chuan lang theiin Mizote tan changkanna a thlen a ni,’ Pu Lal Thanzara, Par. Secy, MFA President ni bawk chuan a ti.

10th Inter District Football Championship 2012 Final nimina Kolasib Diakkawn Field a neih a hmanpuinaah he thu hi Pu Lal Thanzara chuan a sawi a. A bik takin Football-ah hma kan sawn nasa em em a. Thalaite tuihalna hriain Ground pawh khawvel level-a zahpuiawm lo siam a ni ta a, FIFA hmalaknaa National level Referee training te neiin kan Coach te training pe turin Foreigner-Coach te chah an ni a, hei phei chu tunhmaa la awm ngailo a ni, a ti . Kolasib District chuan India ram Club hrang hrangah player 20 vel lai a tir chhuak mek a. Hei vang hian tun tuma hetiang tournament an thleng pawh hi a inhmeh hle a ni, Pu Lal Thanzara chuan a ti bawk. Tun dinhmunah Football hi mi tamtakin eizawn nan an hmang chho ta mek a. Nasa lehzuala he infiamna thianghlim hi bei chho tur leh hlawhtlinna chhar chhuah tum turin Football player te chu a chah a ni.

Pu Lalsiamliana, Kolasib District Football Association chuan Final khelh hmaa inkhawm hi a kaihruai a. Pu Benjamin L. Khiangte, Match Commissioner chuan technical report a pe a ni.

Final hmuhnawm tak khelah Mamit District-in Saiha District chu 2-0 in an hneh a ni. He tournament ah hian District 8 atangin team an tel kim vek a. Group hnih ah thenin final hma hian match 15 khelh a ni a, goal 36 lutin yellow card 30 leh red card tum hnih phawrh a nih thu tarlan a ni.Champion team leh Runner up team te hian Trophy leh Certificate an dawng ve ve a ni.