Nimin chawhnu dar 2:00 khan UD & PA Minister Pu Zodintluanga hovin Commissioner Pu R. L. Rinawma te, Pu K. Lalthawmmawia, UD & PA Director leh SIPMIU Project Director ten Asian Development Bank atanga NERCCDIP project pakhatna hnuaia hnathawh zawh tawhte thlirletna leh project pahnihna hnuaia hna chhunzawm tur leh hmathar lakna turte an sawiho.
North Eastern Region Capital Cities Investment Program (NERCCDIP) hnuaia Project 1-na hna chi hrang hrang State Investment Proramme Management Implementing Unit (SIPMIU) in Asian Development Bank sum hmanga a thawhte chu zawhfel a ni tawh a. Project 2-na hnuaia hna chi hrang hrang thawhna turin 19th November, 2013 khian Asian Development Bank nen cheng vaibelchhe 151.15 atan loan ziahfel leh a ni dawn a; Mizoram sawrkar aiawhin UD&PA Principal Secretary Pu R.L. Rinawma chuan inremnaah hian hming a ziak ang.
NERCCDIP Project 2-na hmang hian Greater Aizawl Water Supply Scheme Phase-II tui pump-na atana kawlphetha mamawh ang zat lakluhna tur siam a ni dawn a; hei hi tihpuitlin a nih chuan he GAWSS Phase II hian a nih tur ang thlapin tui a pump thei tawh dawn a ni. He Project 2 hnuaiah vek hian Aizawl khawpui chawmtu tui pipe chhohna leh tui sem darhna pipe-te chu kum 25 vel laia upate a nih hlawm tawh avangin a thar tha zawka thlak vek a ni dawn a ni. Hei bakah hian tui dahkhawlna tur tuizem lian tham tak tak 3 sak a ni ang a; tui metree 20,000 leh flow meter 85 te thawh tur a ni bawk.
NERCCDIP Project 2 hnuai hnathawh tur langsar tak pakhat chu Aizawl khawpui chhunga zun leh ek thli te, tuihawk leh tuichhe chi hrang hrang mumal taka sawisakna tur ruahman a ni a. Heng tui bawlhhlawh zawng zawngte hi pipe lian tak takah luankhawmtir a ni ang a, chu chu a sawisak thianghlimna hmunpuiah la lutin, tui thianghlim pangngai takah chanter leh vek a ni dawn a ni. Hei hian Aizawl khawpuia leimin thin pawh nasa takin a veng thei dawn a ni. Aizawl-a Veng hrang hrangah vantlang zunin hmun 10-ah sak a ni ang a; septic tank tihfaina motor pawh 5 lei tura ruahman a ni bawk.
NERCCDIP hnuaiah hian Mizoram chu hmar-chhak state dangte aiin hna a thawk thain, a thawk chak fal hle a; Best Implementing State 2011 lawmman pawh Central sawrkara UD&PA chuan a rawn pe nghe nghe a ni. Tun tuma ADB nena Project 2-na atana loan ziahfel tur hi cheng vaibelchhe 151.15 a ni a; Asian Development Bank hian zaa 70 a tum ang a; India sawrkar-in a bak zaa 30 a tum vet hung dawn a ni.
