National Education Day 2012 puala inkhawm vawiina SCERT Auditorium-ah neih chu Education Minister Pu Lalsawta’n a hmanpui. He function Pu K. Lalnghinglova, IAS, Commissioner & Secretary, School Education Department kaihruaiah hian MBSE Chairman Rev. Dr. Lalchungnunga, School Education Department, Higher & Technical Education Department, MBSE, SCERT, RMSA, SSA, DIET leh IASE a thawktu officer leh zirtirtu thahnem tak an tel a ni.
Pu Lalsawta chuan India hi khawvel ram changkang tam takte zingah pawh ram hmasawn chak ber zing ami a ni tiin Zirna kawngah pawh Mizoram hian India ram state te zinga hmahruaitu ni turin hma kan la chho mek a ni, a ti a. Education Department chu Sawrkar Department lian berte zing ami a ni a, mi pahnih khat thil tih sual leh fel lohin ram a deng chhuak chak a, mahse sawiselna te hi a khalh ngiltu leh a siamthatu a ngai turin zirna leh a kaihhnawih a thawk kalkhawmte chu a fuih a ni. Education Minister chuan Zirna hian a daih rei a, a fei a, hnam ro siamna leh ram leh hnam dinchhuahna a ni tiin Mizoramin zirna tha kan neih thei nan zirna lama thawkte chu an hnathawhna-ah heng te hi mangnghilh lo turin a chah bawk a ni.
Kohhran leh private institution te nena thawhhona tha a awm avanga Mizoram zirna chu a than thusawiin Pu Lalsawta chuan zirna lamah tehna hrang hrang, a bikin SSA leh RMSA ah te chuan Mizoram in a tih that thu a sawi lang a. Sawrkar chuan Education Policy a buatsaih mek thu sawi langin, heta ngaih pawimawh zual bikte chu - Zirna hi mimal, chhungkaw leh ram dinchhuahna a nih avangin zirna tha nei tura Sawrkarin hma a lak chho mek thu te; ‘Thiam thei lo’ awm tawh lo tura curriculum, zirlai bu leh kawng dang dang hmanga siamrem mek a nih thu te; Zirna hian mihring hi kawng tinrenga nun puitling nei tura buatsaihtu a nih angin hetiang pe chhuak thei zirna uar zel a nih tur thu te leh mihring chhawrtlak leh mahni pual pawha eizawnna insiam thei tura ‘Eizawnna Tinzawn’ (Vocational Education) uar leh zual tum te chu an ni.
He hunah hian Chief Minister Pu Lal Thawhawlna’n he Ni puala thuchah a siam chu Pu K. Lalnghinglova’n a chhiarchhuah hnuin zirna chungchangah sawihona tawite neih a ni bawk.
India Education Minister hmasa ber Maulana Abul Kalam Azad piancham hriatreng nan nikum atang khan a pianni November ni 11 hi National Education Day-a hman tan a ni.
