Nimin khan Art & Culture Minister Pu R. Lalzirliana'n Ministry of Culture hnuaia awm North East Zone Cultural Centre (NEZCC) Dimapur leh Art & Culture Department tangkawpte buatsaih Discover North East - Mizoram 2019 kharna programme Saitual Playground ah a hmanpui.

Art & Culture Minister Pu R. Lalzirliana chuan Mizo nunzemawi leh chin dan hran hrang humhalh kawngah Art & Culture Department leh NEZCC-te tangkawpin program hrang hrang an huaihawt thin thu a sawi a. Heng program te hi Aizawl a huaihawt anih deuh ber avangin District dang atang chuan a tui tak tak tan pawh chhim a har deuh thin a. Chutiang a nih mek laia, he Discover North East program tum rukna, Saitual District huamchhunga hman a ni hi a lawmawm ka ti hle a ni, a ti.

Minister chuan India chu khawvel huap pawha hnam hrang, tawng hrang leh culture hrang hrang inchawhpawlh tam na ber pawl a ni thu sawiin  khawvel hmasawnna leh changkanna avangin hnam hrang hrangten an ziarang leh an kalphungte an hloh chho mek zel chu Sawrkar laipui pawhin a ngaimawh hle a. India rama cheng hnam hrang hrang te culture hlu tak leh ropui takte vawng nung tur in thapui thawh in sum tam tak sengin hma a la chho mek a. Hnam bil culture te chu humhalh piah lamah hnam dang te nena inpawhna leh thawhhona tha kan neih theih nana min ti pumkhattu a nih theih nan program hrang hrang duangin hma a la mek a ni, a ti a. He kan ministry ngei pawh hian ram leh hnam humhalh a ngai pawimawh em em a, hei tak mai hi NEZCC nena kan thawhhona tichak tu tak pawh a ni nghe nghe, a ti bawk.

Pu R. Lalzirliana chuan hnam dangte nihphung leh ziarang te an hnam lam hrang hrangte, kan kawtkaia hmuh theih mai tura chhawpchhuah ani chu a lawmawm tiin hetiang program hi hnam hrang hrang te inpumkhatna tichak tu leh culture te in zah tawnsakna atan hmanraw  tangkai tak a nih a beisei tih a sawi bawk a ni.

Programme hi Saitual DC Pu C. Lalpeksanga chuan kaihruaiin Pu F. Lalthanmawia, Programme Coordinator chuan Discover North East programme tobul, a tum te leh kalphung te a sawi a. Hun hmanpuitu dang NEZCC Director Pu Jitul Sonowal pawhin thusawiin Central sawrkarin India rama hnam hrang hrang ziarang leh hnamlam mawi tak tak te humhalh tur leh chawikang turin Cultural Centre 7 India ram hmun hrang hrangah a din a, NEZCC hi chutiang Cultural Centre pakhat niin hna a thawk mek a ni, a ti.

Discover North East - Mizoram 2019 hi ni 13 khan Tualbung ah, leh ni 14 khan Mualpheng a te neih niin a tawpna chu nimin khan Saitual ah neih a ni a. He programme ah hian hnam lam hrang hrang - Madhya Pradesh atangin Karma lam leh Badhai lam te; Meghalaya atangin Jaintia hnam lam Shad Pliang lam te; Manipur atangin Tangkhul hnam lam Kharing Kharak Peishak lam te leh Mizoram atangin Chawnglaizawn, Cheraw(Kantlaung) leh Zodin Cheraw te entir a ni a. Heng lam, an hnam rimawi te a hmuna rimawi tum thiamten an tum pah bawk chu mipuiin an hlut hle a ni.

Attachment

  • Loading attachment...