Nimin khan Power Minister Pu R. Lalzirliana'n Saitual District Muaythai Association hawnna programme Saitual Auditorium ah a hmanpui a, he hmunah vek GIG Motors-in motor in zawrhna leh fakna 'Road Show' an buatsaih chu a hawn nghal a ni. Association hawnna programme ah hian Saitual DC Pu C. Lalpeksanga, Saitual SP Pu Lalduhthlanga,  Saitual Addl. DC Pu R. Lalnghakliana, Apex Bank Chairman Pi T. Lalmuanpuii leh Muaythai Association of Mizoram General Headquarters hruaitute an tel a ni.

Power & Electricity enkawltu Minister leh Tawi bialtu MLA ni bawk Pu R. Lalzirliana chuan Saitual District Muaythai Association din a ni chu lawmawm tiin he pawl leh infiammi an chherchhuah tur te chu Saitual District ti hmingthangtu anih ngei a beisei thu sawiin pawl thar hruaitute  duhsakna a hlan a. Muaythai leh contact sports dang khel turin huaisen a tul thu sawilangin Minister chuan taksa leh rilru thianghlim  neih te, kawng engkimah insumna neih te leh nun uluk te chu infiammite tan hlawhtlinna bul a nih thu a sawi a. Mizoram State Games thla leha nei turah Saitual District infiammite chu theihtawp chhuah a tan la turin a fuih bawk a ni.

MMA Adviser Pi T Lalmuanpuii, Apex Bank Chairman ni bawk chuan kumin chhung ngeiin Saitual District atan Apex Bank Branch thar Keifang ah hawng turin tan an la mek tih a sawi. Saitual District Muaythai Association hruaiatute hmeltirna hun hman niin MMA Demonstration Team ten Muaythai a taksa peng hrang hrang inhnek dan leh inkhawih dan an entir a ni.