No.7773/2020-2021          

Tukin khan India in zalenna a hmuh vawi 75-na ropui taka lawmna (Azaadi Ka Amrut Mahotsav India @75) denchhenin Rally- Chanmari atanga Vanapa Hall leh Sikulpuikawn atanga Vanapa Hall buatsaih a ni a. Art & Culture Minister Pu R.Lalzirliana chuan Chanmari kawnah rally hi a vailiam a, Vanapa Hall kawtah thusawina hun a hmang.

Minister Pu R.Lalzirliana chuan India in zalenna a hmuh champha phak vawi 75-na chu kumthar 15th August, 2022 hian kan lo thleng dawn ta a. Ministry of Culture, Govt. of India chuan hemi champha hi ropui takin hapta 75 chhung lawmna hun 12th March, 2021 atanga 15th August, 2022 thleng neih ni se a tih angin vawiin hian Mizoram State chuan kan lo hmang tan ve ta a ni, a ti a. Dandi March hi Kumpinu Sawrkar-in India a awp laia tharum thawhna tel lova mipuiten an lungawi lohna leh Sawrkar thu an zawm duh lohna an lantirna a ni. He Dandi March hian ni 24 chhung awhin, Sabarmati, Ahmedabad, Gujarat hmun atangin ni 12th March, 1930 ah tanin 5th April, 1930 thleng a awh a ni. India Prime Minister zahawm tak Pu Narendra Modi chuan he Zalenna champha kum 75 lawmna chu Dandi March intanna hmun ngei Sabarmati, Ahmedabad, Gujarat State-ah vawiin March ni 12 kumin 2021 hian a hawng dawn a, heta tanga march hi nei tanin ni 5 April, 2021 ah Dandi thleng tura ruahman a ni a, he march ah hian a remchan dan anga tel tur hian State hrang hrang Governor leh Chief Minister te pawh sawm an ni nghe nghe a ni.

Minister chuan zalenna leh hnehna an sualchhuah chu kan chhuangin kan hlimpui hle a ni. He zalenna lawmna ropui tak hapta 75 daih turah hian Central Sawrkar hnuaia Ministry leh Department hrang hrangte chu a taka hman theih tur Project 10 lo puahchah tura tih a ni a. He project tur zingah hian current heh lo Street Light, Smart City 100 chuang siam te, bawlhhlawh awmlohna khawpui 2022 chuang siam te leh ram dang atanga hnathawk tura lo lut te thiamthil zirtir te an ni. Ruahmanna puitham tak zingah hian khawlai zau laia Solar Tree 75 dah te, Park thlan bik 10 te, Platinum Jubilee Model Park-a siam te, Green Country Campaign – thingkung damdawi atana hman theih leh thei rah chhuak tur phun te, India rama technology kan hmante phochhuahna tur Global Tech Festival huaihawt te, Dil thenkhat tihchangtlun te, Luikam siamthat te, Smart School leh Digital Library buatsaih te an ni, tiin a sawi. Kum 1857 khan Delhi Red Fort hmun hlui atangin Bahadur Shah Zafar-a chuan ram zalenna ngiatin min awptute chu a bei a. Jhanshi Rani Lakshmi Bhai te, Reshwa Nana Saheb te, Tantia Tope leh Begum Hazrat te au hla – “Delhi Chalo” tih a ni. He au hla hi thatho tak leh uar takin Netaji Subhash Chandra Bose-a khan a rawn tharthawh leh a, chu au hla thiltithei tak mai chu kum 1947 khan tihfamkim leh hlenchhuah a lo ni ta reng mai  a, vawiinah hian an inpumpekna leh inhlanna te avangin zalenna kan lo nei ta a ni, a ti a. Vawiin ah hian kan hnam Pa Mahatma Gandhi-a inpekna leh ram zalen kan nih theih nana a beihna – Non-Violence, Non-Cooperation Movement kum 1920-21 te Civil Disobedience Movement kum 1930 te, Quit India Agitation kum 1942 te hi kan hriat reng a pawimawh hle ang tiin a sawi.

Rally-ah hian Chanmari atangin Govt. Hrangbana College zirlai leh Sikulpuikawn atangin Govt. Aizawl College zirlai ten bul an tan a, Vanapa Hall kawtah an in tawk khawm a ni.