No.7772/2020-2021

Siaha, March ni 12 :  Vawiin chawhma dar 10:30Am khan MADC Complex-ah Mara Kut zinga lawm hlawh ber leh ropui ber Lyuva Khutla chu hlim leh lawm taka hman a ni.

kumin Lyuva Khutla lawmna programme hi Covid-19 hripui avangin Sawrkar dan leh dun siamte zawm chungin mi pawimawh sawmbik te leh chanvo hrang hrang neih te chauhin he Kut ropui tak hi an chhim a ni. 

Kumin Lyuva Khutla-2021 a Azipa (Kut Pa) a tan Pu S. Hiatô, Ex-CEM & Minister chu hman a ni.

Lyuva Khutla, 2021 hmanna a mipui kalkhawmte chawnglawmna thu  Pu Pachi Hlychho, Chairman Lyuva Khutla Organising Board in sawiin, Pu FC. Zakhai chuan Kut hawnna Hlado a chham a, Pu K. Ngiabei leh Pu K. Thansiama ten Tawtarawt ring taka hamin Lyuva Khutla-2021 chhim tura lo kalkhawm te chu an lo lawmlut bawk  a ni.MTP Branch, Meisavaih East ten Kut hawnna hla mawi taka remin, Rev. Az. Beirona,GS,CCIM in hunserh a hmang. 

Lyuva Khutla-2021 Puanzar chu Azipa Pu S. Hiatô chuan pawtparhin,  vawiin Lyuva Khutla kan  lawm hian Mara hnam hi hnam taima leh intodelh kan nih thin tih min hriat nawn tir se, la dehthiam tak leh hnam bil incheina sil leh fen nei tha tak  kan nihna leh kan hnam ziarang leh lam chi hrang hrang te pholangin chawinung zel rawh se, a ti.

Pu Kesavan R, IAS, District Bawrhsap pawhin Kut thuchah sawina hun hmang vein, Lyuva Khutla lawmna hun kan hman hian Mara hnam lam hrang hrang leh incheina te chawinungin,  khawvel zau zawkah phochhuak rawh se; tiin, Kut buatsaihtute duhsakna a hlan bawk.

Meisavaih West MTP Branch te chuan Sawlakia hmuhnawm tak an entir a, Council vaih MTP Branch ten Athi lâ an entir ve bawk. Vâ-ia lâ chu thiam takin Siahatlâh MTP Branch ten an entir a, New Colony MTP Branch ten Awhkhy lâ thiam takin an entir bawk a ni. Khohcheinô lâ chu Siaha vaihpi MTP branch ten entirin, Pu J. Vachyu leh Pu FC. Zakhai ten Mathyu lâ & Saitlei lâ hmuhnawm tak an entir. Pazita lâ chu ECM vaih MTP Branch ten an entir a, Sâ-ia lâ & Vao-ietlo lâ College vaih MTP Branch ten entir bawk a ni.

Programme kar lakah zaithiam tak tak Pi Vasty Azyu, Pi Chhingpuii Azyu, Pu MC. Mathai, Nl. Jesicca B. Khuhly, Pi T. Merrisa leh Pu John Beizachhi Phuto ten kalkhawm mipuite zaiin an awih reng bawk a ni. 

Pu JB. Chozah, A&CPO chuan lawmthu sawina hun a hmang a, Pu Pachi Hlychho, Chairman chuan Kut puanzar la thlain vawiin Lyuva Khutla lawmna hun hi a khar ta a ni.