94/2022-2023
Aizawl 8th April 2022: Vawiin khan Art & Culture Minister Pu R.Lalzirliana chuan Mizo Zirlai Pawl buatsaih Inter-College Cultural Dance Competition, Zarkawt Recreation Centre-a neih chu khuallian niin a hmanpui.

Pu R.Lalzirliana chuan Mizo culture vawnghim leh chawisang zel turin Zofate hian mawh kan phur, a ti a. Tu culture mah kan zawm thei ngai dawn lo a, kan culture hi hnamdangten min chawisan sak dawn lo tiin zirlaite chu Mizo hnam nunzia chawi nung a, a chhe lai te erawh paih a, zo nun ze mawi vawng nung zel turina chah a ni. Art & Culture Minister chuan MZP in college zirlai te tan hnam lam intihsiak hlawtling tak an buatsaih chu lawmawm a tih thu a sawi a. Zirlai te chu Mizo hnam tana rohlu, ram tana chhen fakawm nih tum turin a fuih a ni.

Mizorama College hrang hrang zirlaite puala buatsaih he hnam lam intihsiakah hian College 7 an tel a. Aizawl khawpui chhung atangin College 3- Govt. J Thankima College, Govt. Aizawl North College leh Govt. T Romana College te an tel a. Aizawl khawpui pawn atangin College 4 - Govt. Lunglei College, Govt. Lawngtlai College, Govt. Champhai College leh Govt. Serchhip College te an tel a ni. He intihsiaka lawmman la tute chu : pakhatna Champhai College, pahnihna Govt T Romana College, pathumna Govt. Aizawl North College te an ni a. Trophy leh citation bakah lawmman pakhatna hian cheng 30,000, lawmman pahnihna in cheng 20,000, lawmman pathumna in cheng 15,000 a keng tel a ni.

Vawiin programme ah hian MZP Gen. Hqrs. President Pu Lalnunmawia Pautu chuan thu a sawi a. Social & Culture Secretary Pu J.Lalrinmawia'n he intihsiakna buatsaih a nih dan leh report pawimawh dang te a sawi a ni.