No.7900/2020-2021

Saitual, 24th March, 2021: Art & Culture Minister leh Bialtu MLA ni bawk Pu R.Lalzirliana chuan vawiin khan Saitual Kohhran Gospel Centenary Hall-ah MUP Saitual District Assembly vawi 1 na chu khuallian niin a hmanpui a. Pu VL Hruaizela Khiangte, Saitual Bawrhsap chu khualzahawm a ni a. Pu Tlanglianthanga, President; MUP Saitual District chuan he hun hi a kaihruai a ni.

Khuallian Pu R.Lalzirliana chuan Saitual District a lo pian hnua MUP, Saitual District Assembly vawi 1 naa sawm a nih chu lawmawm a tih thu a sawi a. Minister chuan upa te chu hnam rohlu an nih thu sawiin ram leh hnam changkang apiangin upa te an ngaihlu a ni a ti. Upa te tawnhriat chu rohlu a nih thu tarlangin khawvel thang chho zelah thangtharten nghet tak leh mahni inringtawk taka khawsak phah nan an hmang thin a, lehkha ziak mi ten ziakin thil hi vawng tha lo se lang chuan hun kal tawha khawvel kalphung te hi kan hre mumal lovang tiin upa te pawn an tawnhriat te chu rohlu tak a nih angin ziakin dah tha thei se a tangkaiin a hlu lehzual ang a ti. Minister chuan upa te hlutna chu thangtharten kan hriat nawn fo a ngai a ni tiin aia upa zah leh chawimawina kawngah pawh tan kan lak lehzual a ngai a, ram changkangah chuan upa te’n ngaihpawimawh leh ngaihhlut an hlawh thu tarlangin Mizo thalaite pawh ram hrang hrangah upa te enkawlna hmunah an inhlawh thin thu sawiin, mithiamte leh ram changkang te chuan upa te hlimna bakah thlamuang taka an khawsak theihna turte leh ei leh in hrisel zawk an mamawhna te chu ngai pawimawhin hma an la thin a, heng kawngah te pawh hian Mizo te pawhin ngaituahna kan sen ve  a ngaih thu a tarlang a ni. Khuallian hian hmun an neih veleh, MUP In sakna tur MLA fund atangin Cheng Nuai 5 a pek tur thu a sawi bawk a ni.

Khualzahawm Pu VL Hruaizela chuan MUP Saitual District chu pawl tho thang tha tak, activity hrang hrangah pawl anga  thawh hlawk tak, district faina leh ramngaw humhalh pawimawhna tu leh fate zirtirtute an ni, tiin a sawi.

MUP Saitual District ah hian Area 9- Saitual, Keifang, Tamdil, Hliappui, Khawdungsei, Phullen, Tuivai, Rungdil, leh Ngopa an awm a. He hunah hian Area hrang hrang atangin member engemawzat an kalkhawm a, chawhnu lamah inthlanna an nei bawk a ni.