No.7901/2020-2021

Dated Serchhip, the 24th March, 2021: Vawiin chhun dar 11:00 khan National TB Elimination Programme, Serchhip District buatsaihin Serchhip Press Club-ah World TB Day, 2021 hman a ni a. Thupui atan “The Clock is Ticking” tih hman niin, Dr. Laldawngliana Sailo, CMO Serchhip chuan khuallian niin a hmanpui.

CMO chuan thusawiin, kum 130 vel liam taa TB natna hrik hmuh chhuah a nih thu puanzar a nih champhaah kum tinin World TB Day hman thin a nih thu a sawi a. TB hi natna enkawl dam awlsam tak, mahse inenkawl loh leh damdawi ei that loh chuan dam har tak ni lawi si a ni a. Khawvel pumah nitin mi 4000 vel TB vangin an thi a, mi 7000 velin natna an kai thar ziah anga chhut a nih thu a tarlang a. He natna umbo tur hian kan zavaia tan tlan a ngai a, kum 2030-ah chuan he natna hi khawvel atanga umbo a nih theih nana hmalak mek niin, chumi hlawhtlin nan chuan mitinte thawhpuiah a sawm nghal a ni. 

He hunah hian Pu Lalsiamthara, Serchhip Bazar veng, TB natna vei damchhuak tawh, TB Champion chuan thu a sawi a. TB natna a vei a ni tih hmuh chhuah a nih atangin thawktuten inpekna nasa tak nena an enkawl thu leh a dam chhuah hnuah harsatna nei miah lova hna a thawh theih thu sawiin, enkawl chuan natna hlauhawm nia a hriat loh thu a sawi a ni.

He hun kaihruaitu Dr. Lalhlunpuii, DTO chuan TB natna umbo a nih theih nana TB enkawlna Programme an hman thin chu January 2020 atang khan National TB Elimination Programme tia thlak a nih thu a sawi a. Serchhip District chu TB natna awm lohna district-a siam tuma hmalak mek an ih thu a sawi a ni. TB natna hi boruak atangin kaichhawn theih a nih avangin hmaituamna kan hman thin hi inven nan a tangkai thu a sawi a. TB natna vei nia inringhlelte chu a rang thei anga damdawi in pan thin tura sawmin, a in entirna leh a enkawlna damdawi zawng zawngte pawh a thlawna pek vek an nih tur thu a sawi bawk a ni. 

Kum 5 chhunga Serchhip District-a TB damlo enkawl a nih dan tlangpui report a pe bawk a. Kumin chhung bikah vawiin thlengin mi 24 enkawl niin mi 23 an dam a, vanduaithlak takin mi 1 erawh a thi a ni. District chhunga TB vei enkawl, mahse damdawi ei tur ei zo lo emaw ngeih loh avanga MDR TB damlo enkawl hi 2021 ah hian mi 2 awmin tunah hian enkawl chhunzawm mek zel an la ni. 

Vawiin World TB Day lawmnaah hian sawm bikte an tel a ni.


Attachment

  • Loading attachment...