Mizo Poetry Society (MIPOTY) buatsaih Ni Hnih awh tur ‘Workshop on Poetry Reading and Writing’ chu vawiin chawhma khan Art & Culture Minister Pu R.Lalzirliana chuan Archives Hall, Babutlang-ah a hawng a, Minister hian MIPOTY member hla phuah dahkhawmna ‘Zaikung Thar Vol. III’ chu a tlangzarh nghal bawk a ni.

Minister Pu R.Lalzirliana chuan hla chu mihring nuna thil pawimawh tak, lungngaihni leh hlim ni a mitin mai nun chawmtu a nih thu sawiin, hla phuahtute hi hnam rohlu an ni, a ti a. Thalai rual intelkhawmin Poetry Society an chu lawmawm a ti a, hla hmanga Zohnahthlak inpumkhatna tur te, nundan kawng inhrilhhriatna te, ram leh hnam humhalh chungchangte, Pathian fakna te phuah zel tura sawmin, Mizoram chu hla hmanga chawi lar turin kalkhawmte a sawm bawk a. Minister chuan hmanlai hla hlui thluka hnam hla leh Pathian fakna hla phuah Kut leh Hawaiian Guitar perh thiamte leh tui mi te tan Kut, Art & Culture Department chuan a buatsaih dawn thu a sawi bawk a ni.

Poetry Workshop hi Art & Culture Department, Govt. of Mizoram bultuma buatsaih a ni a. Workshop hawnna inkhawm hi MiPOTY President Prof. R.L.Thanmawia’n a kaihruai a. Art & Culture Director, Pu R.Hmingthanzuala’n thu a sawi bawk a ni. Vawiin hian Poetry sawifiahna te, a nihphung leh a pawimawhna chungchang, Dr.H.Laldinmawia, Asst. Professor, Department of Mizo, Pachhunga University College-in a sawi a, naktuk lamah Pu Lalsangzuala, Asst. Professor, Department of Mizo, Mizoram University leh Pu C.Chhuanvawra te’n kalkhawmte an zirtir thung ang.

Minister lehkhabu tlangzarh ‘‘Zaikung Thar Vol. III’ ah hian Hla thluk neilo Mizo tawnga ziak hla 204 leh Sap tawnga ziak  32 dah a ni a, hla phuahtu zawng zawng hi mi 56 niin, hmeichhia 38 leh mipa 18 an ni a, Kum 15 leh 65 inkar te an ni hlawm a ni. ISBN pek a ni a, Rs 200 a zawrh tur a ni.

Mizo Poetry Society hi kum 2016 khan hla phuah thiam Rokunga pian cham denchhena din niin tunah hian Mizoram chhung leh pawnah member 140 chuang an nei a. Pawl member tam ber hi College leh University zirlaite an ni. Kumtin March ni 21-ah World Poetry Day hmangin, Sahitya Akademi bultumin kumtin Poetry Festival an buatsaih thin bawk.