FCS&CA Minister Pu K.Lalrinliana chuan vawiin khan Kolasib Multipurpose CoOpeartive Society (KMCS) te hmalakna pakhat Primary Agriculture Credit Society (PACS) chu Kolasib DAO Conference Hall ah a hawng.

Khuallian chuan Society kalphunga rahbi pawimawh tak pakhat PACS hawng thei dinhmuna KMCS a awm chu thil chhinchhiah tlak leh hmasawnna rahbi pakhat ani tiin a lawmpui thu a sawi a, Society hi Kum 1989 vel atanga tawh khan alo hmelhriat thu tarlangin Society hlawhtling ni tur chuan rinawmna leh teirei peihna a pawimawh ber ani ati a. PACS hawn theih ani ta chuan Society kalpui thatna kan hmu chho tan tih  a entir ani ati.

Minister chuan Mizo te chu inlawm thin leh a huhova thil ti thin hnam  kan ni a chu chu Society kalphung nen pawh hian a inrem hle ani tiin Society kaltlang hian khawtlang bakah ram tana thil rohlu tak tak te dehchhuah/thawhchhuah fo tawh ani tih tarlangin Mizoram ah pawh awmze nei leh taima taka kan kalpui chhoh chuan Ram hmasawn nana rahbi pawimawh tak a tling thei ani a ti.

Khuallian chuan KMCS hnuaia PACS hawnna chuan Society dangte hnenah chona pe se tha a tih thu sawiin tan lak nan hmangin hmasawnna ke pen nan hmang se tiin PACS chu changtlung tak leh hlawhtling takin kal chho se tiin duhsakna a hlan a, Minister hian PACS ah hian cheng 5000/- in Account a hawng nghal bawk a ni.

Pi Lalhmunliani Sailo, PACS Development Cell, MCAB Head Office Aizawl chuan PACS chu mi tin huap ani tih tarlangin mi harsa zawk huan lo ram nei leh ran vulh te tan a hlawk leh zual a PACS hnuaia Account hawn a deposit te neih hnu ah loan te a puk theih a, loan rulhna tur punna hi bank pangai aiin a hniam zawka Savings punna chu Bank pangai aiin a sang zawk bawk tih a tarlang ani.

Kolasib District ah hian PACS kalpui pahnih an awm a Village farming Society leh KMCS te an ni a Mizoram Apex Bank hnuaiah hian PACS kalpui Society 26 awm mekin deposit ah cheng vaibelchhe 14 chuang lut tawhin Loan a tan cheng vaibelchhe 12 chuang pek chhuah tawh a ni.

Kolasib Multipurpose CoOperative Society ltd (KMCS) hi April 2018 a Register fel niin Kolasib Project vengah variety Store an nei a, thla 6 chhunga he dawr sales turnover hi cheng 18,00,000/- chuang ani tih tarlan ani a PACS ah hian pawisa dah luh (deposit) leh puk theih ani dawn a deposit punna hi tun dinhmunah 4% ani dawn a, Loan punna hi a lak dan a zirin 12% atanga 14% thleng ni tura ruahman ani.

Mimal Kuthnathawk kum 18 chin chunglam tan Loan cheng 20,000/- chu lo,huan, thlai hmun siam nan bakah ran vulh nan a lak theih a, thla 18 aia reilo chhunga rulh tur niin a punna hi 12% ani anga, tul bikah Managing Committee in cheng 50,000/- aia tamlo a pe chhuak thei ang.