Vawiin khan Vanapa Hall-ah Government Zirtiri  Residential Science College(GZRSC) te chuan Zirlai lut thar te lawmluhna leh zirlai kal chhuak tur te thlahna hun an nei a. He hun hi Higher & Technical Education Minister Dr R.Lalthangliana chuan khuallian niin a hmanpui a ni.

Zirlaite leh Zirtirtute fuihna thu sawiin H&TE Minister Dr R.Lalthangliana chuan ram mamawh chhanna kawnga kan thlaite kan tah hriam dan chu uluk zawka ngaihtuah tlan tha a tih thu a sawi a. " Kan rama hnaruak leh mawhphurhna tam tak state pawn lam miten min thawh sak zel  loh nan Subject thlan danah te thleng pawhin thil kan chik peih a ngai a.  Tunlaia kan sawi fo All India Services a inziak tling kan tlem tak chungchangah pawh zirtirtute leh zirlai ten mawhphurhna sang tak kan nei a ni", a ti.  Zirtirtute pawimawhna sawiin Zirlai hnu fum deuh pawh tha chuangliam deuh nena khalh an nih chuan mi pangai takah chhuah thei vek an ni a ti a. Zirlaite tan hlawhtling tura taihmak leh tawrhchhel  a pawimawh tluk zetin hun hman dik a pawimawh tel  tih a sawi a. Mi tin te  nikhat chhunga hun neih zat a inan vek rualin a hmang tangkai thiam deuh erawh an  hlawhtling bik thin a ni a ti. "Kan chhungkaw dinhmun leh kan lo chhuahna khua  emaw veng te chu a chhuanawm lo a ni mai thei e.  Mahse, hlawhtlin kan tum tak tak a nih chuan kan background mawi mam lo deuh nia kan hriat khan min ti buai tur a ni lo. Huphurhna nei chunga ke pen tan chuan khawiah mah a hlawhtlinna a awm lova. Hei hi zirlai ten in hriat tlat ka duh a ni", tiin zirlaite chu nih tum nei tur leh tumruh turin a chah a ni.

GZRSC Freshers' Social-ah hian he college a zirlai titha zual te chawimawina hun neih a ni a. Principal Pu Laltanpuia hnen atangin college report leh zirlaite fuihna thu sawi ngaihthlak a ni bawk a ni. Tun dinhmunah GZRSC-ah hian zirlai 600 chuang zet an awm mek a. Zirtirtu thawk nghet leh Contract a thawk tiamin 63  an awm mek a, Department 11 a awm a ni. GZRSC Freshers' Social programme-ah hian an college atanga Mizoram University  result hnuhnung bera Top 10 a lang phak te hnenah lawmpuina hlan a ni. Mizoram University Result chhuak taa Home science Department bika Pakhatna hauhtu GZRSC zirlai pakhat hnenah H&TE Minister Dr R.Lalthangliana chuan lawmpuina Rs 5000/- a pe tel a. He hunah hian  GZRSC kum khat hnathawh zirchianna,College Report,  Internal Quality Assurance Cell(IQAC) buatsaih leh College Annual Magazine te chu Khuallian hian a tlangzarh nghal bawk a ni.